მთამსვლელთა ფედერაციის ორგანიზებითა და რამაზ ჯიქიას ხელმძღვანელობით მწვერვალ უშბასა და შხარაზე ჩატარდა სპორტული ექსპედიციები.

18 ივლისს რამაზ ჯიქია, ლევან მოსაშვილი და ნესი მაჭავარიანი გაეშურნენ უშბის პლატოსკენ. ამინდის გაუარესების გამო, უშბის პლატოზე კარავში ხუთი დღის გატარება მოუწიათ. ეს დიდი მენტალური გამოცდა იყო ექსპედიციის მონაწილეებისთვის.

მე-5 დღის დილას ამინდი დასტაბილურდა, შესაბამისად, მთამსვლელები შეუდგნენ ახლადმოსული თოვლის კვალვას, რათა ღამის გასვლისთვის მარშრუტის ნაწილი მაინც შეემსუბუქებინათ. ღამის გასვლის შემდეგ, ექსპედიცია წარმატებით ავიდა მწვერვალზე და შეასრულა დასახული მიზანი. 

3 დღიანი დასვენებისა და აღჭურვილობის გადალაგების შემდეგ, რამაზი და ლევანი მზად იყვნენ შემდეგი ასვლისთვის საქართველოს უმაღლეს მწვერვალზე - შხარაზე.

მათ შეუერთდათ მარიამ გელაშვილი (რომელიც ასევე სვანეთის რეგიონში ახორციელებდა ასვლებს) და კვლავ სამკაციანი ჯგუფი შეუდგა ამ უმშვენიერესი მწვერვალის გზას.

ექსპედიციის წევრები აღნიშნავენ: -“შხარამ ყველა მოლოდინს გადააჭარბა თავისი ველური და მასშტაბური გარემოთი. გზაში გვქონდა ახალი საკარვე ბანაკის მოწყობა, ორი ღამე კარვის გარეშე გათენება და რთული, თუმცა უსაფრთხოების გამო აუცილებელი გადაწყვეტილებების მიღება.

სამწუხაროდ, მარშრუტის კონდიციის გამო 4300 მ.-ზე მობრუნება მოგვიწია — თოვლი

გადაადგილებას ძალიან ართულებდა, ხოლო ამინდი მომდევნო დღეებში უარესობისკენ მიდიოდა. ამის გათვალისწინებით, გადავწყვიტეთ დაშვება, რადგან ასეთი მთიდან

ჩამოსვლაც მარტივი არ არის და ცუდ ამინდში ორმაგად სახიფათო ხდება.

4300 მეტრიდან მყინვარის ბოლომდე ჩასასვლელად დღე-ნახევარი დაგვჭირდა. როგორც კი მიწას მივაღწიეთ, წვიმა და ჭექა-ქუხილიც არ დააყოვნა — თითქოს მთამ ბოლო წამამდე გვაცალა სამშვიდობოს გასვლა და შემდეგ დაიწყო თავისი ძალის დემონსტრირება. ამან კიდევ ერთხელ დაგვარწმუნა ჩვენი გადაწყვეტილების სისწორეში.

რა თქმა უნდა, მწვერვალის გარეშე დაბრუნება ოდნავ საწყენი იყო, თუმცა ემოციები, ხედები, კარვის გარეშე გატარებული ღამეები და ახალი ბანაკების მოწყობა იმდენად საინტერესო და ღირებული გამოცდილება აღმოჩნდა, რომ დიდად გული არ დაგვწყვეტია. როგორც ერთმა კარგმა ადამიანმა თქვა: „მთავარია გზა მწვერვალისკენ და არა თავად მწვერვალი.“ ჩვენც სწორედ ამ გზით ვისიამოვნეთ, ვისწავლეთ და ჩვენს გამოცდილებაში კიდევ ერთი ნაბიჯი გადავდგით.“