გამარჯობა,
მე გახლავართ რუსუდან ნავერიანი, საქართველოს ულამაზესი კუთხე სვანეთიდან, კერძოდ მესტიიდან, ვარ პროფესიით ფილოლოგი, ვარ ასევე გიდ-პედაგოგი და ვმუშაობ მესტიის ისტორიისა და ეთნოგრაფიის მუზეუმში. მინდა ჩემი ისტორია გიამბოთ რომელიც განსხვავებულია და ვფიქრობ საინტერესო იქნება, რადგან 20-ე საუკუნის სვანეთის მნიშვნელოვან მოვლენას ეხება, კერძოდ კი ეს გახლავთ პირველი სვანური ტურისტული გზამკვლევი, რომლის წიგნად გამოცემა ჩემი ცხოვრების მთავარი მიზანი გახლდათ და მის ასრულებაში ევროკავშირის, შვედეთის და ავსტრიის მიერ დაფინანსებული პროექტი GRETA დამეხმარა.
ყველაფერი ჩემს ბავშვობაში დაიწყო, როდესაც სხვენში ვიპოვე ბაბუაჩემის არქივი, ბაბუისა, რომელმაც დიდი როლი ითამაშა სვანეთის განვითარებაში და იყო პირველი გზამკვლევის ავტორი, ეს გახლდათ სილვესტერ (სილიბისტრო) ნავერიანი. ადამიანი რომელიც რეპრესირებული იყო საბჭოთა რეჟიმის მიერ 30-იან წლებში და გაურკვეველ ვითარებაშია გარდაცვლილი, სხვა იმდროინდელი ქართველი მოღვაწეების მსგავსად. აქ თავმოყრილი იყო მასალები სვანეთის რეგიონში სხვადასხვა ტურისტული მარშრუტების შესახებ, ფაქტობრივად ეს მასალები იყო სვანეთის პირველი გზამკვლევი და შეიძლება ითქვას ფასდაუდებელი ინფორმაცია ჩამივარდა ხელში. აქედან გამომდინარე ჩემი ცხოვრების მიზნად დავისახე ამ ყველაფრის ერთად თავმოყრა და მისი წიგნად გამოცემა.
პროექტ გრეტას შესახებ ადგილობრივი მუნიციპალიტეტიდან შევიტყვე, მე როგორც გითხარით გიდი გახლავართ, სხვადასხვა კულტურულ ტურებზე დავყვები ჯგუფებს და ფაქტობრივად ტურიზმის სფერო ჩემი გენეტიკური სფეროა. ვინაიდან დონორების მიერ დაფინანსებული პროექტის ერთ-ერთი მიმართულება ტურიზმის მხარდაჭერა იყო მაღალმთიან რეგიონში და კერძოდ სვანეთში, გადავწყვიტე მონაწილეობა მიმეღო, რადგან ჩავთვალე, რომ ეს იყო შესაძლებლობა ამესრულებინა ბაბუის ჩანაფიქრი.
როგორც ჩანს ჩემი იდეა საინტერესო აღმოჩნდა საგრანტო პროგრამისთვისაც, გავიმარჯვე და მივიღე დაფინანსება, რომლითაც შევძელი წიგნად გამომეცა აღნიშნული მასალები. ეს მნიშვნელოვანი მხარდაჭერა იყო ჩემთვის, რადგან მე თვითონ ვერანაირ საშუალებას ვერ გამოვნახავდი ამ წიგნის დასაბეჭდად. ასევე იყო დიდი მოტივაცია რომ ჩანაფიქრების განხორციელება შესაძლებელია მსგავსი პროექტების მხარდაჭერით. ასევე იყო კარგი გამოცდილება უცხოურ პროექტთან თანამშრომლობის. ამ წარმატებული მაგალითის საფუძველზე შემიძლია ვთქვა რომ ადამიანმა არასდროს არ უნდა დაკარგოს იმედი და ზოგჯერ ოცნებებიც კი ხდება!
ამ პოზიტიურმა მოვლენამ მომცა მოტივაცია და სტიმული ჩემი სხვა გეგმების ასრულებაზე მუშაობის დასაწყებად, რომელიც რა თქმა უნდა კვლავ ბაბუის და სვანეთის გარშემო მოიაზრება. აქვე ვიტყვი, რომ მიუხედავად ბევრი კარგი პროექტისა რომელიც სვანეთში ხორციელდება, ვფიქრობ კიდევ უფრო მეტი ყურადღება უნდა მიექცეს სვანეთს და უფრო მეტად უნდა იქნას შესწავლილი, ის ხომ საქართველოს განძთსაცავია. აი თუნდაც ერთ მაგალითს გეტყვით: აქ ისეთი არტეფაქტებია აღმოჩენილი, მათმა გამოკვლევამ შეიძლება სრულად შეცვალოს არა მარტო საქართველოს, არამედ მსოფლიო ისტორია.
გეგმებზე საუბარს დავუბრუნდები და გეტყვით რომ დიდი სურვილი მაქვს ბაბუაჩემის ბიოგრაფია დავწერო წიგნად და ასევე მის მშობლიურ სოფელში აღვადგინო ძველი სახლი და იქ ერთი ოთახი მოვაწყო სვანეთის ტურიზმის ისტორიის ამსახველი მასალებით. ამიტომ მოხარული ვიქნები და სიამოვნებით ვითანამშრომლებ GRETA-ს მსგავს საინტერესო საგრანტო პროექტებთან, დაინტერესების შემთხვევაში კი საკომუნიკაციოდ მზად ვარ ტელეფონისა: 595 08 36 95 და ელ-ფოსტის: cnsvaneti@gmail.com მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის