svanetinews.ge

მესტიის რაიონი სოფელი ეცერის მაცხოვრებლები უჩვეულო სანახაობის მომსწრენი გახდნენ. ერთ-ერთ მიტოვებულ სახლში აღმოჩენილმა ადამიანის ფეხის ნაკვალევის ზომამ სვანები ისევ დააეჭვა „ქამ მერდეს“ არსებობა-არარსებობის საკითხზე, რადგან სიდიდით ის ჩვეულებრივი ადამიანის ფეხის ზომას ბევრად აღემატებოდა. “ქამ მერდე“ სვანურიდან ითარგმნება როგორც „გარეთ მყოფი“. მსოფლიოში კი ის სხვადასხვა სახელითაა ცნობილი. ქართულად მას ტყის კაცი, ოჩოპინტრე ან დევი ჰქვია, ინგლისურად-დიდტერფა, რუსულად - თოვლის კაცი, ჰიმალაიში კი იეტს უწოდებენ. ეს არ არის პირველი შემთხვევა, როდესაც სვანები მსგავსს ნაკვალევს ნახულობენ. სვანებმა „ქამ მერდეს“ ნაკვალევი მონასტერ "კალასთან" 1956 წელს და ქლუხორის უღელტეხილზეც, 1973 წელს შენიშნეს. რამდენიმე დღის წინ კი ლეგენდად შემორჩენილმა „ქამ მერდემ“ სვანებს თავი ისევ შეახსენა. მსგავს რამდენიმე ნაკვალევს სოფელ ებუთშიც გადააწყდნენ. როგორც ადგილობრივები ამბობენ, მან ერთ-ერთ მაცხოვრებელს ცხენიც კი დაუფრთხო, ცხენმა კი მხედარი ჩამოაგდო,რომელიც ამტკიცებს,რომ ცხენი სწორედ „ქამ მერდემ“ შეუშინა. სოფელი ეცერის მაცხოვრებელს გია სუბელიანი ამბობს, რომ ეს სურათი თავად გადაიღო და საკუთარ ფეისბუკზეც ატვირთა. "ამ ნაკვალევს ჩვენ სოფელში ერთ-ერთ მიტოვებულ სახლში პირველად ბავშვი გადააწყდა და შემდეგ დაგვიძახა უფროსებს. ის ვისაც ეკუთვნის ეს ფეხის ნაკვალევი, ეზოდან შესულა და იქვე აივანზე, ბეტონზე დაუტოვებია კვალი. წინა ღამეს ძლიერი წვიმა იყო და ფეხის ტერფის ანაბეჭდებიც ახალი დატოვებული იყო, თუმცა იქვე მყოფებმა შევამოწმეთ და ნაკვალევი ცხიმოვან ნივთიერებასაც შეიცავდა,სპეციფიკური სუნიც კი ჰქონდა. ნაკვალევი ახლაც კი ამჩნევია,მხოლოდ სველი რომ ყოფილიყო, აორთქლდებოდა.კარგი იქნება თუ ამ ნაკვალევს ვინმე კომპეტენტური პიროვნება შეისწავლის. 24.04.2016

სვანეთში თოვლის კაცის ნაკვლევი აღმოაჩინეს

დღის სხვა სიახლეები