გამარჯობა,
მე ომარ ლობჯანიძე ვარ, რაჭიდან, კონკრეტულად საქართველოს ერთ-ერთ ულამაზეს სოფელ ღებიდან, ჩემი საქმიანობა მოიცავს ტურიზმისა და ბიო ორგანული სოფლის მეურნეობის ნაზავს, ასევე მაქვს საოჯახო სასტუმრო, რომელიც ბაზარზე “Adventure Holidays in Ghebi”- ის სახელით ცნობილი და რომელსაც ჩემს მეუღლე მალგორჟატასთან ერთად ვუძღვები. უფრო ზუსტი იქნება თუ ვიტყვი რომ 2018 წელს დაიწყო ეს საქმიანობა ჩემმა მეუღლემ და 2019 წელს უკვე მეც შევუერთდი. მსურველებს სხვადასხვა საინტერესო ტურებს ვთავაზობთ, როგორც საფეხმავლო ისე საცხენოსნო ტურებს, ასევე გვაქვს საკმაოდ საინტერესო მთის უსაფრთხოების ტრენინგებიი. მოკლედ ბევრი მიმართულება გვაქვს გაერთიანებული და ვცდილობთ სტუმრებს კარგად გავაცნოთ ის სასწაული რასაც მთის რაჭა ჰქვია.
მაღალმთიან რეგიონში წამოწყებული ნებისმიერი საქმიანობისთვის ხელშეწყობა ფასდაუდებელი მნიშვნელობისაა. ჩვენს ისტორიაშიც ასე მოხდა როდესაც მეუღლემ სოციალური ქსელით შეიტყო ევროკავშირის, შვედეთის და ავსტრიის მიერ მხარდაჭერილ პროექტ GRETA-ს შესახებ. აღნიშნული ინიციატივა მოიცავდა ჩვენს რეგიონს, აფინანსებდა სამთო ტურიზმს და ჰყავდა საკმაოდ სოლიდური დონორები, რამაც გადაგვაწყვეტინა მონაწილეობის მიღება. გადაწყვეტილება მალევე გარდაიქმნა კონკრეტულ ბენეფიტებში, როდესაც გავიმარჯვეთ და მოვიპოვეთ დაფინანსება, რომელიც დიდი სტიმული და მოტივაცია აღმოჩნდა ჩვენთვის.
დეტალურად მინდა მიღებულ დახმარებაზე გიამბოთ, რადგან ამ ყველაფერმა განაპირობა ტურისტების რაოდენობის გაზრდა, ცნობადობის ამაღლება და მეტად უსაფრთხო გახადა ჩვენი საქმიანობა, რომელიც განსაკუთრებით ჩვენს მიერ დაგეგმილ ტურებზე აისახა. დონორების დახმარებით სათავგადასავლო ტურიზმისთვის საჭირო აღჭურვილობა და ნივთები გადმოგვეცა, რაც მოვითხოვეთ იყო კარვები, საძილე ტომრები, ჯიპიესები, რაციები, ვიდეო კამერა და დრონი. ჩვენ გვაქვს საუნა და პროექტის ფარგლებში გადმოგვეცა დუშ-კაბინა, საოჯახო ტექნიკა სასტუმროსთვის და ასევე აუცილებელი ინვენტარი, რომელიც მთაში დაგეგმილი მარშრუტების უსაფრთხოებას უზრუნველყოფდა. მიღებულმა აღჭურვილობამ შესაძლებლობა მოგვცა დაგვემატებინა არაერთი საინტერესო ტური და კიდევ უფრო მრავალფეროვანი გაგვეხადა ჩვენი სერვისი.
დღევანდელი გადმოსახედიდან შეიძლება ითქვას რომ ნებისმიერი შესაძლებლობა აუცილებლად გამოსაყენებელია, მითუმეტეს როცა საქმე მაღალმთიან რეგიონს ეხება. ჩვენთვის გრეტასთან თანამშრომლობა სტიმულის და განვითარების მომცემი აღმოჩნდა. უკვე დავიწყეთ ფიქრი საქმიანობის გაფართოებაზე და გვინდა სასტუმროს გაკეთება წამოვიწყოთ ჩვენს მეორე სახლში, რომელიც შედარებით დახვეწილი და 10-12 სტუმარზე გათვლილი იქნება.
დასასრულს ვიტყოდი, რომ წინააღმდეგობების მიუხედავად საჭიროა წინსვლა, მიზნისკენ სწრაფვა და იდეის განხორციელების სურვილი, ეს არის წარმატების განმაპირობებელი ფაქტორი. ჩვენი წარმატების გასაგრძელებლად კი მზად ვართ სიამოვნებით ჩავერთოთ ახალ საგრანტო პროგრამებში და დაინტერესების შემთხვევაში ჩვენთან კომუნიკაცია შესაძლებელია ელ-ფოსტის: ghebiadventure@gmail.com და ფეისბუქ გვერდის „Adventure holidays in Ghebi” საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის