გამარჯობა,
მე გახლავართ მაკა ცერცვაძე, საქართველოს ულამაზესი კუთხე სვანეთიდან, კერძოდ უშგულიდან, სადაც მაქვს საოჯახო სასტუმრო „ძველი კოშკი“, პროფესიით იურისტი ვარ, თუმცა 7 წელია რაც საჯარო სამსახურიდან წამოვედი და გადავწყვიტე ჩემი გამოცდილება და პროფესიონალიზმი ჩემს, ვფიქრობ საინტერესო წამოწყებას მოვახმარო. როდესაც ხარ მაღალმთიან რეგიონში და სურვილი გაქვს საკუთარი ბიზნესი დაიწყო, ეს ბევრ სირთულეებთან არის დაკავშირებული და ამ გზაზე სასიცოცხლოდ მნიშვნელოვანია ნებისმიერი დახმარება. ამიტომაც ვეძებდი ისეთ შესაძლებლობას, რომელიც ჩემს იდეას სრულყოფილად რეალიზების საშუალებას მისცემდა. ამ პროცესში შევიტყვე ევროკავშირის, შვედეთის და ავსტრიის მიერ მხარდაჭერილ პროექტ GRETA-ს შესახებ, რომელიც მაღალმთიან რეგიონებში სამთო ტურიზმის მიმართულებას აფინანსებდა. ინიციატივა საკმაოდ მიმზიდველად გამოიყურებოდა და რადგან მე როგორც იურისტს მქონდა პროექტების წერის გამოცდილება, გადავწყვიტე მეცადა ბედი, რადგან მანამდეც მქონდა ინფორმაცია მსგავსი პროექტების მიერ განხორციელებულ ღონისძიებაზე ჩვენს რეგიონში და ეს რეალურ შესაძლებლობად დავინახე.
ჩემი მიზანი იყო დამეხვეწა და გადამეხალისებინა ჩემი საოჯახო სასტუმრო, აღმეჭურვა საჭირო ტექნიკით და ამასთან ეზოში მდებარე პატარა კაფეც იგივენაირად გამემართა. როგორც აღმოჩნდა ჩემი მოთხოვნა შესაბამისი აღმოჩნდა საგრანტო პროექტის პირობების და მალევე მივიღე დადებითი პასუხი, რაც ნიშნავდა დაფინანსებას, რომლითაც შევძლებდი ჩემი საქმიანობა უფრო მდგრადი გამეხადა.
პროექტის ფარგლებში მიღებული დახმარებით მოვახერხე სამზარეულოს თითქმის სრულად განახლება ტექნიკის კუთხით, შევიძინე მაცივარი, მიკროტალღური ღუმელი, ხორცსაკეპი მანქანა, მიქსერი, ასევე შევიძინე სასტუმრო ოთახებისთვის საჭირო ავეჯი და შეიძლება ითქვას რომ უფრო დავხვეწეთ სერვისი, უფრო ხარისხიანად და სწრაფად ვამზადებთ პროდუქტს, დავასაქმეთ კიდევ ერთი ადამიანი, შემოსავალი მცირედით, მაგრამ გაიზარდა. ყოველივე ეს არის პოზიტიური ტენდენცია, აჩენს მყარი განვითარების საფუძველს და არის მოტივაციის მიმცემი სხვა მეწარმეებისთვის.
ჩემი ამ მცირე წარმატებიდან გამომდინარე, მინდა დამწყებ მეწარმეებს ვუთხრა რომ სწორად დასახონ მიზანი, განახორციელონ საკუთარი სურვილები, დაიწყონ მცირედით და შრომის შედეგად წარმატება აუცილებლად მოვა! ჩემს შემთხვევაშიც ასე იყო, დავიწყე მცირე მიზნით, ვცადე და გამომივიდა, ამ წარმატებულმა პრეცედენტმა კი უკვე თავდაჯერებულობა შემძინა და სხვა გეგმებზე ფიქრის საფუძველი გამიჩინა. რადგან გეგმებზე საუბარზე გადავედით, გეტყვით რომ GRETA -ს დახმარება არის დიდი მოტივაცია, რომ კიდევ უფრო გავაფართოვო ჩემი საქმიანობა და ვფიქრობ უახლოეს მომავალში ჩემი ამჟამად 12 ადამიანზე გათვლილი სასტუმრო, დიდ საოჯახო სასტუმროდ გარდავქმნა. ასევე დიდი სურვილი მაქვს უცხო ენების შესწავლის, რომელიც დამეხმარება ეფექტურ კომუნიკაციაში ჩემი საქმიანობიდან გამომდინარე და აუცილებლად ვგეგმავ ახალ საგრანტო პროგრამებთან თანამშრომლობას. ეს გრეტასთან თანამშრომლობის წარმატებულმა მაგალითმა განაპირობა და დაინტერესების შემთხვევაში მზად და ღია ვარ საკომუნიკაციოდ ყველა სოციალური ქსელის თუ განთავსების პლატფორმის და ასევე ტელეფონის: 599807174 და ელ-ფოსტის: makacercvadze1974@gmail.com საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის