სვანეთინიუსი 14.06.2024

„მოიძიონ ინფორმაცია GRETA-ს მსგავს პროექტებზე და აუცილებლად ჩაერთონ“-ლევან ნიკოლოზიანი, მეწარმე

23.10.2023 20:55

გამარჯობა,


მე გახლავართ ლევან ნიკოლოზიანი, ულამაზესი კუთხე სვანეთიდან, სოფელ ლატალიდან,  პროფესიით ზოოინჟინერი და ვსაქმიანობ ძირითადად სოფლის მეურნეობის სფეროში. ვაწარმოებ ეკო პროდუქტს, მომყავს კარტოფილი და ჩემს ისტორიასაც ამის გარშემო გიამბობთ, რომელშიც გარდამტეხი როლი ევროკავშირის, შვედეთის და ავსტრიის მხარდაჭერით დაფინანსებულმა პროექტმა GRETA-მ  შეასრულა.


პროექტის შესახებ ინტერნეტის საშუალებით შევიტყვე, რომელიც საკმაოდ საინტერესოდ ჩანდა პირველადი გაცნობისთანავე, ძალიან მიმზიდველი თანადაფინანსების პირობა ჰქონდა და თან მაღალმთიანი რეგიონები შედიოდა მისი დაფარვის ზონაში. ვინაიდან ჩემი მიზანი იყო წარმოების გაძლიერება და შრომის შემსუბუქება, ჩავთვალე რომ ეს იყო კარგი შესაძლებლობა და გადავწყვიტე პროექტში ჩართვა. აქვე დავამატებ, რომ ჩემი შვილი დავითიც გრეტას ბენეფიციარია, ორივემ ცალ-ცალკე შევიტყეთ გრეტას შესახებ და მერე გავარკვიეთ რომ ერთი და იგივე პროგრამის მონაწილეები ვყოფილვართ. თამამად ვიტყვი ძალიან გაგვიმართლა, რომ ამ უნიკალური პროექტის მონაწილეები გავხდით.


დონორების დახმარებით საშუალება მომეცა შემეძინა ტრაქტორი, აგრეგატები, ფრეზი, რომელიც მიწას აფხვიერებს, ასევე დავესწარი ტრენინგებს, სადაც მივიღე ის აუცილებელი ინფორმაცია რაც სამეწარმეო საქმიანობაში საჭიროა მარკეტინგის და ბრენდინგის მიმართულებით. შედეგად ჩემი დიდი ხნის ოცნება ახდა, გამიადვილდა შრომა და ამას გარდა სოფელში სხვა მეწარმეებისთვისაც შევძელი ხელის გამართვა, ვისაც ტრაქტორი ჭირდებოდა. ჩემმა მაგალითმა რეგიონში დიდი მოტივაცია გამოიწვია, გაჩნდა დაინტერესება მცირე მეწარმეობის და საერთაშორისო პროექტებში მონაწილეობის მიმართ.


მეტად თვალსაჩინო რომ იყოს უფრო დეტალურად მინდა ვისაუბრო GRETA-ს ფარგლებში მიღებულ დახმარებაზე და გეტყვით მთავარ შედეგს, შეიქმნა შესაძლებლობა საქმიანობის გაფართოების, უფრო ზუსტად კი დავიწყეთ იმ მიწების დამუშავება და მასზე კარტოფილის მოყვანა,  რომლებზეც მანამდე არც კი გვიფიქრია. ამას ვერასდროს წარმოვიდგენდი თუ რა უნდა ყოფილიყო ის მიზეზი, რომ ისე განგვევითარებინა წარმოება, რომ ამ მიწების დამუშავებამდე მოვსულიყავით.  თუ მანამდე შეგვეძლო გუთნით და ხარებით 1 ჰა მიწის მოხვნა, დღეს 5 ჰა შეგვიძლია თავისუფლად დავამუშაოთ, ეს ნამდვილად შემიძლია წარმატებად ჩავთვალო. 


აქედან გამომდინარე მაქვს საფუძველი სხვა დაინტერესებულ მეწარმეებს ვუთხრა, რომ მოიძიონ ინფორმაცია მსგავს პროექტებზე და აუცილებლად ჩაერთონ, ყურადღება მიაქციონ ბიო მიმართულებას, არ გამოიყენონ შხამ-ქიმიკატები, სჯობს ცოტა მოსავალი იყოს და ეკოლოგიურად სუფთა, რადგან ამას უფრო და უფრო მეტი ყურადღება ეთმობა მსოფლიოს მასშტაბით. ჩემი ოცნებაა და  გულწრფელად მინდა ჩვენი ქართული წარმოება ისე მოვაძლიეროთ, რომ არ დაგვჭირდეს უცხო ქვეყნებიდან ექსპორტი და ჩვენივე ეკოლოგიურად სუფთა პროდუქტით დავაკმაყოფილოთ ადგილობრივი ბაზრის მოთხოვნა. ამიტომ დიდი სურვილი მაქვს კიდევ უფრო მეტად გავზარდო ბიო კარტოფილის წარმოება, აუცილებლად მივიღო ბიო სერტიფიცირება და ჩემი მაგალითი გახდეს მოტივაციის მიმცემი სხვა მეწარმეებისთვისაც.


რომ შევაფასო, ეს თანამშრომლობა პოზიტიურ გამოცდილებად შეიძლება ჩაითვალოს, რომელმაც განვითარების მყარი საფუძველი გააჩინა და სხვა მსგავს პროექტებთან თანამშრომლობის სურვილი გააჩინა. შესაბამისად მზად ვარ ჩავერთო ახალ საგრანტო პროგრამებში, დაინტერესების შემთხვევაში ხელმისაწვდომი და ღია ვარ საკომუნიკაციოდ ტელეფონის: 577333988 და ელ-ფოსტის: Murtazcham@gmail.com საშუალებით.

---

ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.

თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.

 

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს. 


 #68წარმატებისისტორია

#ევროკავშირი #შვედეთი #ავსტრია

#პროექტიGRETA #მთისეკონომიკისგანვითარებისთვის

GE EN RU