გამარჯობა,
მე ვარ თეკლე ცხვედიანი, რაჭიდან, ამბროლაურის მუნიციპალიტეტის სოფელ ქვიშარიდან, ჩემი ამჟამინდელი საქმიანობის სფერო არის ტელეკომუნიკაციები და ასევე მევენახეობა, რომელიც მამაჩემის დაწყებულია და მისი გარდაცვალების შემდეგ ვცდილობ ღირსეულად გადმოვიბარო. სამწუხაროდ ცოტათი განსხვავებული ისტორია გამომდის მაგრამ რეალობა ესაა. რადგან მამა ვახსენე, გეტყვით რომ სწორედ მისი სურვილი იყო ჩვენს საგვარეულო მიწაზე გაეშენებინა ბიო ვენახი, სადაც ასევე იქნებოდა საოჯახო სასტუმრო და მარანი. მისი მცდელობით იყო GRETA პროექტის მოძიება და მასში მონაწილეობის მიღებაც, ყველაფერი მას უკავშირდება და ჩვენც, მე დედა და მთელი ოჯახი დღემდე ვცდილობთ დეტალებში გარკვევას, დაწყებული საქმიანობის გადმობარებას და შენარჩუნებას.
რაც დანამდვილებით შემიძლია გითხრათ არის ის, რომ ევროკავშირის, შვედეთის და ავსტრიის მხარდაჭერით განხორციელებული პროექტი GRETA ნამდვილად დიდი შესაძლებლობა იყო ჩვენთვის და სამწუხაროა რომ დავით ცხვედიანი ვერ მოესწრო იმ ბედნიერ მომენტს, როდესაც ამ პროექტში გავიმარჯვეთ და დაფინანსება მივიღეთ. პროექტის ფარგლებში მიღებული ფინანსური მხარდაჭერით შევიძინეთ ტრაქტორი, შესაბამისი აღჭურვილობით და ასევე მოგვეცა საშუალება შეგვეძინა 1000 ძირი მუჯურეთული და ალექსანდროულის ჯიშის ყურძენი, რომლითაც გავაშენეთ ახალი ვენახი. რა თქმა უნდა ფოკუსირება ბიო მიმართულებაზე გვქონდა და ახალი ვენახიც ყველა სტანდარტის დაცვით გავაშენეთ. თუმცა ბიო სერტიფიცირება ჯერ არ გვაქვს და ამასაც აუცილებლად მივაღწევთ.
ჩემი არც თუ ისე პროფესიონალური გამოცდილებითაც კი სამეწარმეო სფეროში, შემიძლია შევაფასო რომ საგრანტო პროგრამა რომლის მეშვეობითაც დახმარება მივიღეთ ნამდვილად მნიშვნელოვანი იყო. პირველ რიგში იმით, რომ შევძელით ვენახის გაფართოება, მეორე ის რომ საკუთარმა ტრაქტორმა დაგვიზოგა თანხები და დროში დააჩქარა მიწის დამუშავების პროცესი. ელემენტარულად აღარ გვიწევს რიგში ჩადგომა მიწების დასამუშავებლად, ეს ზოგადად სერიოზული პრობლემაა რაჭაში, მესამე ის რომ დამატებითი მოტივაცია გააჩინა სოფლად მიბრუნების და ბოლოს ამ პროექტმა საშუალება მომცა მამაჩემის დაწყებული საქმე გამეგრძელებინა და მისი ჩანაფიქრები განმეხორციელებინა. ეს ჩემთვის ძალიან დიდი ბედნიერება აღმოჩნდა.
ბევრი ლაპარაკით თავს აღარ მოგაბეზრებთ რადგან მეც ახალი შემოსული ვარ ამ სფეროში. უბრალოდ, დასასრულს ზოგადად ვიტყოდი სამოტივაციოდ რომ წარმატების მისაღწევად მთელი სულით და გულით არის შრომა გასაწევი. აქვე ხაზგასმით აღვნიშნავ რომ მაქვს უდიდესი პასუხისმგებლობა და მოტივაცია რომ მამაჩემის, დავით ცხვედიანის დაწყებული საქმე ბოლომდე მივიყვანო და დავტკბე წარმატების იმ შედეგით, რაც თავის დროზე მამაჩემის ოცნება იყო.
ამიტომაც მზად ვარ ახალ პროექტებთან თანამშრომლობისთვის, იმედიანად ვარ განწყობილი რომ დაინტერესება აუცილებლად იქნება და საკომუნიკაციოდ ხელმისაწვდომი ვარ ჯერჯერობით მხოლოდ ტელეფონისა: 579974497 და ელ-ფოსტის: Datotskhvediani65@gmail.com საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის