გამარჯობა,
მე თამარ ელბაქიძე ვარ, საქართველოს თვალწარმტაცი კუთხე რაჭიდან, მაქვს საოჯახო სასტუმრო სოფელ წესში, რომელიც წინაპრების 130 წლიან ძველ რაჭულ სახლში გავაკეთეთ და სტუმრებს ავთენტურ ძველ რაჭულ გარემოს ვთავაზობთ, ადგილობრივი ტრადიციებისა და სამზარეულოს გაცნობასთან ერთად. ჩვენი ოჯახი მუდმივად ხალხმრავალი და სტუმრიანობის მოყვარული იყო და იდეაც აქედან გაჩნდა, როდესაც ერთ-ერთმა სტუმარმა გვირჩია ამ სასიამოვნო გარემოსთვის ბიზნესის თვალითაც შეგვეხედა. საკმაოდ საინტერესო გამოწვევა იყო და კონცეფცია გვინდოდა განსხვავებული ყოფილიყო, შეგვეთავაზებინა ავთენტური გარემო სტუმრებისთვის, გაგვეცნო ადგილობრივი ძველი ტრადიციები, როგორ ხვდებოდნენ სტუმრებს, როგორ იმოსებოდნენ და თუნდაც როგორი ჭურჭლით სარგებლობდნენ ჩვენი წინაპრები. ეს არასტანდარტული მიდგომა იყო და გარკვეულ რისკებს შეიცავდა, თუმცა წარმატებით გამოგვივიდა, რაშიც მნიშვნელოვანი წვლილი შეიტანა ევროკავშირის, შვედეთის და ავსტრიის მხარდაჭერით განხორციელებულმა პროექტმა GRETA-მ.
პროექტის შესახებ მეუღლემ მოიძია ინტერნეტის საშუალებით ინფორმაცია, ასევე ადგილობრივი მუნიციპალიტეტიდანაც გავრცელდა ინფორმაცია გრეტას შესახებ და ისედაც ჩვენ მუდმივად ვადევნებდით თვალს საგრანტო პროგრამებს, მე პირადად აგროტურიზმის მიმართულებით სხვადასხვა ქვეყნებში მომიწია ტურებში მონაწილეობა და აქედან გამომდინარე სულ მქონდა სურვილი ეს გამოცდილება საკუთარ ქვეყანაში რეალურ პროექტად მექცია.
ძალიან საინტერესო და ვფიქრობ საკვანძო მომენტზე მინდა გიამბოთ, რომელმაც შეიძლება ითქვას განაპირობა ჩვენი და გრეტას წარმატებული თანამშრომლობა და დიდი მოტივაცია მოგვცა. კონკურსში მონაწილეობის განაცხადის გაკეთების შემდეგ ჩვენთან წესში GRETA-ს წარმომადგენლები მონიტორინგის მიზნით ადგილზე იყვნენ ამოსულები, მაშინ ჯერ არ იყო ნაგებობა აშენებული, (ნაგებობაში ვგულისხმობ მეორე შენობას ანუ კოტეჯს) საძირკვლის ჩასხმის სამუშაოები მიმდინარეობდა და მიუხედავად ამისა, მათ ჩვენ გამოგვიცხადეს ნდობა და ამ ფაქტორმა ცალსახად დადებითად იმოქმედა მთელს პროცესზე.
ნდობა გამოიხატა კონკრეტულ დახმარებაში რაც დონორების დახმარებით მივიღეთ და რამაც სრულყოფილი სახე მისცა ჩვენს საქმიანობას. პროექტის ფარგლებში ჩვენ გავაკეთეთ ცენტრალური გათბობის სისტემა, რაც ნიშნავდა წელიწადის ოთხივე სეზონზე უწყვეტ სამუშაო ციკლს. ასევე შევიძინეთ ავეჯი, სრულად მოვაწყვეთ სამზარეულო, საძინებლები, შევიძინეთ ჭურჭლის სრული სერვირება. როდესაც მიღებულ დახმარებაზე ვსაუბრობ, აუცილებლად მინდა ვახსენო ჩატარებული არაჩვეულებრივი ტრენინგები მარკეტინგის და ბრენდინგის კუთხით, გავერკვიეთ ციფრულ ტექნოლოგიებში, დაგვიმზადდა საინფორმაციო ლიფლეტები, ვიდეო კლიპები და მოკლედ თუ რამე შეიძლებოდა აბსოლუტურად ყველა დახმარება მივიღეთ რათა ვყოფილიყავით წარმატებულები.
ეს იყო დიდი შესაძლებლობა და მოტივაცია, გაიზარდა სტუმრების რაოდენობა, რადგან როგორც გითხარით ოთხივე სეზონზე შეგვიძლია უკვე სრული დატვირთვით მუშაობა, იყო დიდი გამოცდილება უცხოურ პროექტებთან თანამშრომლობის და დღეს უკვე მოთხოვნა იმდენად დიდია, ზოგჯერ სამწუხაროდ სტუმრებისთვის უარის თქმაც კი გვიწევს. რომ შევადარო 3-ჯერ გაიზარდა დამსვენებლების რაოდენობა და აუცილებლად დავასრულებთ მეორე კოტეჯს რომ გაზრდილი მოთხოვნა დავაკმაყოფილოთ.
გეგმებზე საუბარზე გადავედით და ვიტყოდი რომ უახლოესი მიზანია, შევქმნათ შესაბამის ინფრასტრუქტურა რომ უარი არ ვუთხრათ ჩვენთან დასვენების მსურველებს, ასევე დავამატოთ სივრცე ტრენინგებისა და კონფერენციებისთვის, კორპორატიული ღონისძიებებისთვის, გვინდა უფრო მეტმა ადამიანმა შეიგრძნოს ეს ავთენტური გარემო და დაესწროს სამზარეულოს მასტერ კლასებს. გეგმაში გვაქვს სარელაქსაციო სერვისის შეთავაზებაც, კერძოდ გვინდა იაპონური ტექნოლოგიით დამზადებული კასრები გვქონდეს იმ სტუმრებისთვის, რომლებსაც არ უნდათ აქტიური სამთო ტურიზმი და სურთ წყნარი დასვენება.
ჩვენი გეგმების განსახორციელებლად მზად ვართ კიდევ მივიღოთ მონაწილეობა მსგავს საგრანტო პროგრამებში, სხვა დამწყებ მეწარმეებსაც ვურჩევდი ისარგებლონ ამ შესაძლებლობით, სჯეროდეთ საკუთარი თავის და იმ მიზნის, რომლისკენაც დაიწყებენ სვლას. დაინტერესების შემთხვევაში ჩვენთან დაკავშირება შესაძლებელია ტელეფონის: 593151335, ელ-ფოსტის: tamrielb2017@gmail.com და ინსტაგრამ გვერდის misha_elbaqidze მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის