გამარჯობა,
მე ვარ ვლადიმერ ძნელაძე, თვალწარმტაცი ზემო იმერეთიდან, კერძოდ ტყიბულის მუნიციპალიტეტის სოფელ საწირედან, ჩაის მწარმოებელი და შ.პ.ს „ოკრიბას“ დამფუძნებელი. სამეწარმეო საქმიანობაში მთელი ოჯახით ვართ ჩართული, ვაწარმოებთ ბიო ორგანული ჩაის და მუდმივ მზადყოფნაში ვართ ახალ ინიციატივებთან თანამშრომლობისთვის, რათა მეტად გავაფართოოთ ჩვენი საქმიანობა. სწორედ ჩვენი სურვილი და მზაობა გახდა მიზეზი, რომელმაც დაგვაკავშირა უნიკალურ პროექტ GRETA-სთან, რომლის შესახებაც მეგობარმა კომპანიებმა გვირჩიეს და დამატებითი ინფორმაციის მოძიების შემდეგ უპირობოდ გადავწყვიტეთ მასში მონაწილეობის მიღება. რადგან დავინახეთ პერსპექტივა ჩვენი პროდუქციის საზღვარგარეთ გატანის და ასევე ის, რომ ეს პროექტი მხარს უჭერდა ბიო მიმართულებას. ჩვენ როგორც ზემოთ უკვე გითხარით ბიო ჩაის ვაწარმოებთ რეალურად, მიუხედავადა იმისა რომ ჯერ ბიო სერტიფიცირება არ გვაქვს.
მონაწილეობის მისაღებად რამდენიმე ეტაპის გადალახვა იყო საჭირო, რომელიც წარმატებით დავძლიეთ და გავხდით ბენეფიციარები. დღევანდელი გადმოსახედიდან შემიძლია გულწრფელად ვთქვა, რომ გრეტას ფარგლებში მიღებულმა დახმარებამ უმნიშვნელოვანესი როლი შეასრულა ჩვენი სამეწარმეო საქმიანობის სრულყოფილად გამართვისთვის. უფრო დავაზუსტებ და გეტყვით რომ მიღებული დაფინანსებით შევიძინეთ ჩაის საწარმოებლად აუცილებელი დანადგარები, ასევე შევიძინეთ ხილის ჩირის საწარმოებელი აპარატი, ხილის სარეცხი დანადგარი, ხილის საჭრელი დანადგარი, ვაკუუმ და დასაკალიბრებელი აპარატები. ალბათ იკითხავთ რა კავშირი აქვს ჩაის წარმოებას ხილის ჩირის საწარმოებელ აპარატებთან, მე კი გეტყვით რომ მიღებული დანადგარები იყო უდიდესი დახმარება, რადგან საშუალება მოგვეცა ჩაისთან ერთად ჩვენს საწარმოში ხილის ჩირი გვეწარმოებინა. უფრო თვალსაჩინოდ რომ ავხსნა გეტყვით: ჩაის მიმართულებაზე მუშაობა, სეზონურია და 6 თვეს მოიცავს, შესაბამისად გვიწევდა ნახევარი წელი მოცდის რეჟიმში ყოფნა. ხოლო მიღებულმა დანადგარებმა მოგვცა საშუალება რომ საწარმო არ გაჩერებულიყო და იმ დანარჩენი 6 თვის განმავლობაში ხილის ჩირის წარმოებაზე გადავრთულიყავით.
ასევე უმნიშვნელოვანესი იყო მარკეტინგული კუთხით გაწეული დახმარება, ვიტყოდი რომ უმთავრესიც კი, რადგან საშუალება მოგვეცა ჩვენი პროდუქცია უცხოურ ბაზარზე წარგვედგინა. გრეტას ფარგლებში მონაწილეობა მივიღეთ დუბაი ექსპოსა და ნიურნბერგის გამოფენებზე, სადაც რამდენიმე საქმიანი კონტაქტი დავამყარეთ, გავეცანით წარმოების თანამედროვე მიდგომებს, მივიღეთ საერთაშორისო დონის ფორუმებზე მონაწილეობის გამოცდილება და თამამად ვიტყვი, რომ ეს უდავოდ დიდი შესაძლებლობაა ჩვენნაირი მცირე მეწარმეებისთვის.
ამ ყველაფრის შედეგად გაგვეზარდა ცნობადობა, გაგვეზარდა გაყიდვები და სულ თავისუფლად შეიძლება ჩვენი თანამშრომლობა საგრანტო პროგრამასთან წარმატებულად შეფასდეს. ბიო მიმართულებას რაც შეეხება, ბიო სერტიფიცირების პროცესში ვართ ჩართულები და დიდი მოლოდინი გვაქვს რომ მალე ავიღებთ ხარისხის ნიშანსაც. ყველაფერს დრო ჭირდება, მათ შორის ხარისხიან წარმოებაზე გადასვლასაც და ჩვენც მოთმინებით ველოდებით შედეგს. მოთმინება და წარმოებაში ხარისხის შენარჩუნება არის ის, რასაც მოაქვს წარმატება.
ჩვენი გეგმები საკმაოდ ამბიციურია და გვინდა უახლოეს პერიოდში ერთ-ერთი მთავარი ჩაის მწარმოებლები ვიყოთ რეგიონში. ასევე გვსურს დიდი მასშტაბით ავითვისოთ ევროპული ბაზარი, როგორც ჩაის, ისე ხილის ჩირის მიმართულებით. აქედან გამომდინარე, ჩვენი მიზნების მისაღწევად მზად ვართ ახალ პროექტებთან სათანამშრომლოდ და საკონტაქტოდ ხელმისაწვდომები ვართ ტელეფონის: 599747700, ფეისბუქ გვერდის Bueti Georgian Tea და ჩვენი ვებ გვერდის მეშვეობით Bueti.ge
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის