გამარჯობა,
მე გახლავართ გოჩა ძნელაძე, რაჭიდან, კერძოდ ამბროლაურის მუნიციპალიტეტიდან, პროფესიით კვების ტექნოლოგი და შ.პ.ს „GEO FLOWER” დამფუძნებელი. ჩვენ ვაწარმოებთ ორგანულ ბრენდირებულ ჩაის და შეიძლება ითქვას რომ ქართულ ბაზარზე უნიკალურებიც კი ვართ. მიუხედავად უკვე მიმდინარე წარმატებული სამეწარმეო საქმიანობისა, ჩვენ მუდმივად ვართ დაინტერესებული გაფართოების და განვითარების კუთხით და სწორედ ეს იყო მიზეზი ჩვენი კომპანიის გადაკვეთისა ევროკავშირის, შვედეთის და ავსტრიის მხარდაჭერით განხორციელებულ პროექტ GRETA-თან, რომელიც ბიო მიმართულებას უჭერდა მხარს.
საგრანტო პროგრამასთან თანამშრომლობა შეიძლება რომ ცალსახად დადებითად შეფასდეს, რადგან რამდენიმე ეტაპის წარმატებით გავლის შემდეგ გავიმარჯვეთ და მოვიპოვეთ დაფინანსება, რომლითაც შევიძინეთ დამფასოებელი დანადგარები. აქ საუბარია კომპოსტის წარმოებაზე, რომელიც დანადგარებით უზრუნველყო გრეტამ, ხოლო ჩვენი თანამონაწილეობა იყო საწარმოს მშენებლობა. მეტი სიცხადისთვის გეტყვით რომ კომპოსტი გულისხმობს საკუთარი ორგანული ნარჩენების გადამუშავებას. ასევე გვქონდა მეორე მიმართულება და ეს იყო ორგანული ბრენდირებული ჩაის წარმოება, რომელიც ასევე წარმატებით განვახორციელეთ.
არ შემიძლია არ ვახსენო პროექტის ფარგლებში მიღებული მარკეტინგული მხარდაჭერა და ჩატარებული საინტერესო ტრენინგები. მარკეტინგის ნაწილზე გავაგრძელებ საუბარს და ვიტყვი რომ ეს იყო უდიდესი შესაძლებლობა, რადგან მოვახერხეთ და ჩვენი პროდუქცია წარვადგინეთ მსოფლიო ბაზარზე. მონაწილეობა მივიღეთ ბიო ფახის საერთაშორისო გამოფენაზე და შევძელით ჩვენი საქმიანობის სულ სხვა მასშტაბზე წარმოჩენა, რაც ყოველგვარი გადაჭარბების გარეშე, ნამდვილ წარმატებად შეიძლება ჩაითვალოს ჩვენნაირი მცირე მეწარმეებისთვის.
ყოველივე ზემოთ თქმულიდან გამომდინარე უმნიშვნელოვანესი აღმოჩნდა დონორების დაფინანსებით განხორციელებული მხარდაჭერა. კომპანიაში დაგვემატა ახალი მიმართულება დაფასოებული ჩაის წარმოების კუთხით, გაიზარდა გაყიდვების რაოდენობა, კომპანია გახდა ეკომეგობრული და ჩვენი პროდუქცია მსოფლიომ გაიცნო. იმედს ვიტოვებ რომ ჩვენი ისტორია სხვა დამწყები მეწარმეებისთვის მოტივაციის მიმცემი აღმოჩნდება და ერთ, ვფიქრობ საინტერესო მომენტზე გავამახვილებდი ყურადღებას, რაც მგონია რომ დღევანდელი ქართულ სამეწარმეო და ბიზნეს საქმიანობაში პრობლემას წარმოადგენს. ნებისმიერი ახალი წამოწყებისას ადამიანს ზუსტად უნდა ქონდეს განსაზღვრული თუ სად მოახდენს შექმნილი პროდუქტის რეალიზებას, წარმოების ან ბიზნესის დაწყება უნდა გამომდინარეობდეს ბაზრის კონიუნქტურიდან.
გეგმებზეც ვიტყვი რამდენიმე სიტყვას, რასაკვირველია ვფიქრობთ წარმოების გაფართოებას და ახალი პროდუქტების დამატებას. ჩემს თავს ისევ ამ საქმიანობაში ვხედავ კიდევ უფრო მყარად წარმოდგენილს და GRETA-თან პოზიტიური თანამშრომლობის საფუძველზე კიდევ ვისურვებდი მსგავს პროექტებს საქართველოში. ასე რომ განვითარებისთვის მზად ვარ მსგავს პროგრამებთან სათანამშრომლოდ და დაინტერესების შემთხვევაში საკომუნიკაციოდ ხელმისაწვდომი ვარ ტელეფონის: 599506026, ელ-ფოსტის: g.dzneladze@geoflower.ge, ფეისბუქ გვერდის GEO FLOWER და ასევე ჩვენი ვებ საიტის საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის