სვანეთინიუსი 14.06.2024

„საქართველოს უნდა ვუყუროთ ისე როგორც ჩვენ სახლს, დავინახოთ მისი სილამაზე და დავაფასოთ მისი პოტენციალი“- გიორგი ლიპარტელიანი ტურისტული გიდი, გამყოლი

22.10.2023 19:01

გამარჯობა,მე ვარ გიორგი ლიპარტელიანი, ქვემო სვანეთიდან, კერძოდ ლენტეხის მუნიციპალიტეტიდან, ჩემი საქმიანობა გახლავთ სათავგადასავლო ტურიზმი, ვარ ტურისტული გიდი, გამყოლი, ვგეგმავ სხვადასხვა საინტერესო ტურებს და ვცდილობ ჩვენი ქვეყნის უნიკალური ბუნება რაც შეიძლება მეტ ადამიანს გავაცნო. მიუხედავად იმისა, რომ პროფესიით იურისტი ვარ, ტურიზმის სფეროში ვარ გადმორთული თავიდან ბოლომდე ბოლო რამდენიმე წელია, რამაც საშუალება მომცა უკეთესად გამეცნო საკუთარი ქვეყანა და სხვა თვალით დამენახა ის ტურისტული პოტენციალი რაც ჩვენ გაგვაჩნია.


ჩემი საქმიანობა, ისევე როგორც ყველა სხვა, მოითხოვს განვითარებას, წინსვლას, მრავალფეროვნებას, სწორედ ამაზე მინდა მოგიყვეთ და გულწრფელად ვთქვა რომ უდიდესი ბედნიერებაა ჩვენს მიმართულებაში ისეთი პროგრამების გამოჩენა, როგორიც ევროკავშირის, შვედეთის და ავსტრიის მიერ დაფინანსებული პროექტი GRETA გახლდათ. ჩემი დატვირთული გრაფიკიდან გამომდინარე გრეტას შესახებ მეგობრისგან შევიტყვე, რომელმაც მოწონება თავიდანვე დაიმსახურა, რადგან მაღალმთიან რეგიონებში ტურისტული მიმართულების მხარდაჭერას მოიაზრებდა, ანუ ზუსტად ემთხვეოდა ჩემს საქმიანობას, შესაბამისად გადავწყვიტე მონაწილეობა მიმეღო და მესარგებლა ამ შესაძლებლობით.


პროექტის დაწერის შემდეგ წარმატებით გავიარე რამდენიმე ეტაპი და  გავხდი გრეტას ბენეფიციარი. სწორედ ეს იყო ის მომენტი, რომლის შედეგადაც ჩემი საქმიანობა გახდა სრულყოფილი და გეტყვით რატომაც.   მთავარი ჩემი პრობლემა გახლდათ შესაბამისი აღჭურვილობის უქონლობის გამო საკარვე ტურების ორგანიზება, როდესაც მთაში გიწევს ღამის გათენება,  რის გამოც ბევრ საინტერესო მარშრუტზე მიწევდა უარის თქმა. ვაკეთებდი მხოლოდ სტანდარტულ ტურებს და ფაქტობრივად განვითარების პერსპექტივის გარეშე მიმდინარეობდა ჩემი საქმიანობა.


ამიტომაც მინდა ხაზგასმით ვთქვა რომ დონორების მიერ განხორციელებულმა დახმარებამ ჩემს ტურებს მეორე სიცოცხლე შესძინა. მოვახერხე და შევიძინე სრული აღჭურვილობა 12 კაცზე, ესენი იყო კარვები, საძილე ტომრები, საველე სამზარეულოს ჭურჭელი, ცხენის ჩანთები, სამზარეულოს ტენტები, ერთი სიტყვით ყველაფერი რაც მთაში ღამის გასათევად იყო საჭირო. ამან ხელ-ფეხი გამიხსნა ჩემი საოცნებო მარშრუტების დასაგეგმად და გეოგრაფიულად გამეზარდა მარშრუტების რაოდენობა. აქედან გამომდინარე დადგა ის საინტერესო შედეგი, რომ მომეცა უნიკალური შესაძლებლობა ქვემო სვანეთში ავითვისო ისეთი მარშრუტები, რომელიც სრულიად უცნობია, სრულიად დაკარგულია და ზოგადად მინდა მთლიანად სვანეთის რეგიონს ახლებური ტურისტული ფუნქცია შევძინო.


დამემატა 5 ახალი, საინტერესო მარშრუტი, რომელმაც გამოიწვია ტურისტების რაოდენობის გაზრდა და ჩემი საყვარელი საქმის კეთება კიდევ უფრო მეტი მოტივაციით გავაგრძელე. ყოველთვის უნდა ვეცადოთ შევქმნათ სიახლეები, არ მოვექცეთ ჩარჩოებში, გავამრავალფეროვნოთ ჩვენი საქმიანობა, ეს მგონია წარმატების საფუძველი. აქვე ვიტყოდი რომ საქმიანობის სფეროს მიუხედავად, მნიშვნელოვანია რომ საქართველოს შევხედოთ როგორც საკუთარ სახლს, დავინახოთ მისი სილამაზე და დავაფასოთ მისი პოტენციალი.


სამომავლო გეგმებიც რასაკვირველია სათავგადასავლო ტურიზმს უკავშირდება და მინდა უფრო მეტი საინტერესო ტური დავამატო, მაგალითად საცხენოსნო ტური რომელიც სვანეთში ჯერ არაა ფეხმოკიდებული. ჩემი მიზნების განსახორციელებლად ვაგრძელებ ახალი საგრანტო პროექტების ძიებას რომელიც ახალ შესაძლებლობებს მომცემს და დაინტერესების შემთხვევაში ხელმისაწვდომი ვარ საკონტაქტოდ ფეისბუქ გვერდი Giorgi Liparteliani (Travel Guide in Georgia) და ასევე ჩემი საიტის www.Reiseziel-Kaukasus.de მეშვეობით.

---

ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.

თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.

 

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს. 


 #68წარმატებისისტორია

#ევროკავშირი #შვედეთი #ავსტრია

#პროექტიGRETA #მთისეკონომიკისგანვითარებისთვის

GE EN RU