გამარჯობა,
მე ბესო ჭელიძე ვარ, სვანეთის ჯადოსნურ სოფელ უშგულიდან, პროფესიით ისტორიკოსი, თუმცა ამჟამად მაქვს სასტუმრო ბიზნესი და კაფე-რესტორანი. უშგული ისეთი ადგილია, რომ თითქმის ნებისმიერ ბიზნეს საქმიანობას შეიძლება სეზონური ეწოდოს, მკაცრი კლიმატური პირობების გამო. აქედან გამომდინარე ჩვენი საქმიანობისთვის გაჩნდა გადაიარაღების აუცილებლობა, რადგან ის ძირითადი 4 თვე რომელიც სამუშაოდ აქტიურია, გვინდოდა ეფექტური ყოფილიყო. განახლებისთვის საჭირო დაფინანსების ძიების პროცესში, სოციალური ქსელის მეშვეობით შევიტყვე პროექტ GRETA-ს შესახებ, რომელიც ჩვენს რეგიონს მოიცავდა და საკმაოდ საინტერესო თანადაფინანსების პირობები ჰქონდა. ასევე დონორების მხარდაჭერა ჩანდა საინტერესოდ, რაც პროექტს მეტ სანდოობას მატებდა და შეიძლება ითქვას ამ ფაქტორებმა გადამწყვეტი როლი ითამაშა. ამიტომ გადავწყვიტე კიდეც მონაწილეობის მიღება, დავრეგისტრირდი, დავწერე პროექტი, გამიმართლა და გავხდი საგრანტო პროგრამის მონაწილე.
კაფე-რესტორნისთვის გრეტას ფარგლებში მნიშვნელოვანი დახმარება მივიღე, ეს იყო როგორც მანამდე გითხარით განახლებისთვის საჭირო სამზარეულოს ტექნიკა, ავეჯი და ინვენტარი, ჭურჭლის სარეცხი მანქანა, გაზქურა, ყავის აპარატი, სკამები, მაგიდები, ქოლგები, მოკლედ ყველაფერი ის, რაც დაგეგმილი მქონდა. შედეგად გაუმჯობესდა სერვისი, გამრავალფეროვნდა მენიუ, გაიზარდა სტუმრების რაოდენობა და უკვე გაგვიჩნდა საფუძველი რომ ჩვენი ბიზნესი გავაფართოოთ, არსებული ღია კაფე-რესტორანს დავამატოთ რესტორანი სვანური სამზარეულოთი და 15 ნომრიანი სასტუმრო. რომ შევაჯამო ვიტყვი რომ მსგავსი პროექტები დიდი სტიმულია მაღალმთიანი რეგიონების მეწარმეებისთვის.
დახმარების ნაწილში აგრეთვე მინდა ვახსენო მარკეტინგული მხარდაჭერა, გაიზარდა ჩვენი ცნობადობა, გრეტას ფარგლებში ჩვენ ვუმასპინძლეთ Highlander Georgia - ს მონაწილეებს, რამაც ასევე დადებითად იმუშავა ჩვენი ობიექტის იმიჯზე. უნდა ვახსენო ჩატარებული ტრენინგები, რომელზე მიღებული ცოდნა ბიზნესის კუთხით წარმატებით მადგება პრაქტიკულ საქმიანობაში.
ყოველივე ეს მაძლევს საფუძველს ტურიზმში დასაქმებულ ადამიანებს ვურჩიო მსგავს პროექტებზე ინფორმაციის მოძიება და ამ შესაძლებლობის გამოყენება, ასევე მიიღონ ტრენინგებსა და სემინარებზე მონაწილეობა, რათა მიიღონ ახალი ინფორმაცია, თანამედროვე მიდგომები დანერგონ საქმიანობაში და წარმატებაც აუცილებლად მოვა!
მეც, როგორც უკვე რამდენიმე პროექტის ბენეფიციარი, მიღებული პოზიტიური გამოცდილების საფუძველზე კვლავ ვაპირებ ახალ საგრანტო პროგრამებში მონაწილეობის მიღებას. ზემოთ როგორც ვახსენე, ვგეგმავ 15 ნომრიანი სასტუმროს გაკეთებას, სვანური ტრადიციული სამზარეულოთი და აქედან გამომდინარე ახალი საქმიანი ურთიერთობები, პირდაპირ რომ ვთქვათ სასიცოცხლოდ მნიშვნელოვანია ჩემი ბიზნესის განვითარებისთვის. დაინტერესების შემთხვევაში საკომუნიკაციოდ ღია და ხელმისაწვდომი ვარ ტელეფონის: 591193821 და ელ-ფოსტის: beso.chelidze@gmail.com მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის