გამარჯობა,
მე ვარ ბადრი დარსაძე მოქმედი მეფუტკრე და ყოფილი ფეხბურთელი ტყიბულის რაიონის სოფელ წყნორიდან, ცოტა უცნაურად ჟღერს ალბათ ფეხბურთელი და შემდგომ სულ სხვა საქმიანობა, მაგრამ გეტყვით რომ გვიან არასდროს არაა ახალი საქმიანობის შესასწავლად. უკვე 15 წელია რაც სპორტს ჩამოვშორდი, გეტყვით რომ ბოლოს სამწვრთნელო კარიერაც მქონდა, თუმცა იმ მოტივით რომ მინდოდა ეკოლოგიურად სუფთა გარემოში მეცხოვრა, სუფთა საკვებით და ჯანსაღ გარემოში აღმეზარდა შვილები, გადავწყვიტე დავბრუნებოდი სოფელს სადაც დავიბადე და გავიზარდე. ამ დროს დავინტერესდი მეფუტკრეობით და ჩემი სპორტული დისციპლინითა და თავდაუზოგავი შრომით მოვედი ამ შედეგამდე, რომელსაც თამამად ვიტყვი რომ წარმატებული შეიძლება ეწოდოს. დღესდღეობით ვარ მეფუტკრეობა „გელათის“ დამფუძნებელი და ვაწარმოებ ეკოლოგიურად სუფთა თაფლს.
როდესაც განვლილ გზაზე და წარმატებაზე ვსაუბრობ, გვერდს ვერ ავუვლი იმ მონაკვეთს როდესაც ევროკავშირის, შვედეთის და ავსტრიის მხარდაჭერით განხორციელებულ პროექტ GRETA-თან მოხდა ჩემი გადაკვეთა. რამაც ჩემი საქმიანობა გამართა, მოაძლიერა და განვითარების მყარი საფუძველი გაუჩინა. პროექტის შესახებ მეუღლემ მოიძია ინტერნეტში ინფორმაცია, შემდეგ ადგილობრივ სოფლის მეურნეობის ცენტრში მოვიძიეთ დამატებითი ინფორმაცია და რადგან ჩვენს რეგიონს ფარავდა და ბიო წარმოების მიმართულებას მოიაზრებდა, გადავწყვიტე მეცადა ბედი. პროექტის დაწერის შემდეგ გავიარე ეტაპები და ვიტყვი რომ გამიმართლა და გავხდი გრეტას ბენეფიციარი.
დონორების ფინანსური დახმარებით მივიღე დანადგარები რომლებმაც პირველ რიგში გაამარტივა სამუშაო პროცესი და რაც ყველაზე მნიშვნელოვანია გამომითავისუფლა ადამიანების შრომა, მოგეხსენებათ დღესდღეობით თუ რამხელა პრობლემას წარმოადგენს რეგიონში კადრების მოძიება. ესენი იყო უნიკალური ხარისხის ციბრუტი ანუ საწური, ფიჭის ამთლელი ელექტრო მაგიდა და დანა, ასევე უჟანგავი ჭურჭელი რომელმაც საშუალება მომცა თაფლი შევინახო და საჭიროების მიხედვით მოვახდინო მისი რეალიზება. გავაგრძელებ და შემდეგს ვიტყვი ჩატარებულ ტრენინგებს, სადაც მიღებულმა საჭირო ინფორმაციამ მომცა სწორი ხედვის ჩამოყალიბების საშუალება და ასევე გამოვყოფდი იმ მნიშვნელოვან ეტაპს, როდესაც აგრო-ექსპერტი გვყავდა მომაგრებული და გვიზიარებდა სასარგებლო გამოცდილებას.
ამ ყველაფერმა კი ბიო წარმოებაზე გადასვლის და განვითარების საფუძველი გააჩინა და აქვე ვიტყვი რომ ბიოსერტიფიცირების პროცესშიც ვარ ჩართული და მალე მექნება სერტიფიკატი. ზოგადად სხვა მეწარმეებსაც ვურჩევდი რომ მეტი ყურადღება დაუთმონ ბიო მიმართულებას, რადგან სულ უფრო მეტად იზრდება მოთხოვნა მსოფლიოში. ჩემი სამომავლო გეგმებიც ბუნებრივია ფუტკრის რაოდენობის გაზრდასა და ბიო წარმოების გაფართოებას უკავშირდება, რაც კიდეც ერთხელ ვიტყვი გრეტა პროექტის დახმარებამ განაპირობა.
საუბრის მიწურულს, ჩემს მაგალითზე ვიტყვი რომ წარმატების საფუძველი არის შრომაში და კეთილსინდისიერად მიდგომაში იმ საქმისადმი, რომელსაც აკეთებ, თუნდაც სულ ახალი და განსხვავებული საქმიანობა იყოს ეს. თვალსაჩინო მაგალითად ჩემი ისტორია შეგვიძლია ავიღოთ, როდესაც სპორტიდან მეფუტკრეობაში აღმოვჩნდი და გულით მიდგომამ და თავდადებამ შედეგი გამოიღო.
ახალი საქმიანი კავშირებისთვის და განვითარებისთვის მზად ვარ კვლავაც ვითანამშრომლო GRETA-ს მსგავსად სხვა პროექტებთან და პროგრამებთან და დაინტერესების შემთხვევაში საკონტაქტოდ მზად ვარ ფეისბუქ გვერდის „მეფუტკრეობა გელათი“ საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის