გამარჯობა,
მე ანა გურგენიძე ვარ, საქართველოს ლამაზი კუთხე რაჭიდან, ამბროლაურის მუნიციპალიტეტის სოფელ ნიკორწმინდიდან, პროფესიით თერაპევტი და მაქვს საოჯახო სასტუმრო და კოტეჯი „მერო“. საოჯახო სასტუმრო, 2018 წელს გავაკეთე ბებია ბაბუის სახლში და მინდა ვთქვა საკმაოდ წარმატებითაც, მთელი ამ ხნის მანძილზე ნაჩვენებმა დაინტერესებამ და კმაყოფილი სტუმრების რაოდენობამ მომცა საფუძველი გამეფართოებინა საქმიანობა და იმავე ეზოში კოტეჯი ამეშენებინა. მშენებლობის საწყის ეტაპზე ვიყავით, როდესაც გამოჩნდა შესაძლებლობა საგრანტო პროექტ GRETA-ს სახით, რომელიც მაღალმთიან რეგიონებში ტურიზმის მიმართულებას უჭერდა მხარს. მის შესახებ ინტერნეტის მეშვეობით შევიტყვე და დამატებითი ინფორმაციის მოძიების შემდეგ გადავწყვიტე მონაწილეობა მიმეღო, რადგან საკმაოდ იმედისმომცემად გამოიყურებოდა და პლუს ამას საკმაოდ მიმზიდველი თანადაფინანსების პირობები ჰქონდა.
პროექტში მონაწილეობის პირველი ცდა წარუმატებელი აღმოჩნდა რადგან ჩემი კოტეჯი მშენებლობის პროცესში იყო და პირობების მიხედვით მშენებლობის ხარჯების დაფინანსება არ ხდებოდა. მაგრამ ამ დაბრკოლებამ უარი ვერ მათქმევინა მიზანზე, გავმხდარიყავი საგრანტო პროგრამის მონაწილე. ამიტომ შემდეგ წელს როდესაც დავასრულე მშენებლობა, გრეტას პირობებს მოვარგე ჩემი მოთხოვნები და შედეგიც მალევე დადგა, ფინალური ეტაპის გავლის შემდგომ გავიმარჯვე და გავხდი ბენეფიციარი.
შედეგად მივიღე კოტეჯის სრულად მოსაწყობად საჭირო ყველა ავეჯი თუ საოჯახო ტექნიკა, რაც მის გამართულ მუშაობას უზრუნველყოფდა. ეს ნიშნავდა რომ ფაქტობრივად მზად ვიყავი მემასპინძლა პირველი სტუმრებისთვის. ასევე ამ დახმარებით მოვახერხე სხვა სეგმენტზე გასვლა, რადგან კოტეჯი თავისი ინფრასტრუქტურით, აღჭურვილობით და სერვისით უკვე საშუალო სეგმენტის მოთხოვნებს აკმაყოფილებდა და შესაბამისად ფასიც უფრო მაღალი იყო ვიდრე საოჯახო სასტუმროსი.
რადგან საგრანტო პროგრამის ფარგლებში მიღებულ ბენეფიტებზე ვსაუბრობ, აუცილებლად მინდა გამოვყო კიდევ ერთი მნიშვნელოვანი ფაქტორი, რაჭაში საოჯახო სასტუმროებს და ახალ აშენებულ კოტეჯებს შორის კონკურენცია დიდია და ბოლო დროს შეიძლება ითქვას რომ საოჯახო სასტუმროები კონკურენციას ვეღარ უძლებენ. აქედან გამომდინარე 8-10 სტუმარზე გათვლილი კოტეჯის დამატებამ და მისმა სრულად აღჭურვამ დახმარება გაუწია საოჯახო სასტუმროს და საერთო ბრენდის ქვეშ მოქცევამ უფრო მდგრადი გახადა ორივე მიმართულება, ერთმანეთი გააძლიერა ასეც შეგვიძლია ვთქვათ.
ამ შედეგიდან გამომდინარე უკვე შევძელი სამომავლო გეგმების დასახვაც. ვფიქრობ რა თქმა უნდა განვითარებას და ღია სივრცეში სხვადასხვა ღონისძიებების და ივენთების მოსაწყობად საჭირო სივრცის შექმნას. მოგეხსენებათ ნიკორწმინდაში ხშირად იწერენ ჯვარს და გვინდა აქ ამოსულ სტუმრებს შევთავაზოთ ჩვენი სერვისი, ღონისძიების დაგეგმვა და დიდი იმედი გვაქვს ამ მიმართულებით კარგად განვვითარდებით.
რასაკვირველია ეს ყველაფერი ვერ იქნებოდა GRETA-ს დახმარების გარეშე, ვერ იქნებოდა თუ მე ამ გზაზე შექმნილ სირთულეს დავნებდებოდი და ამიტომ საკუთარ გამოცდილებაზე დაყრდნობით ვიტყვი, რომ ბრძოლას ყოველთვის აქვს აზრი და ნებისმიერი სირთულე შესაძლებელია რომ საინტერესო გამოცდილებად ვაქციოთ.
სწორედ ამიტომაც კიდევ უფრო მეტი მოტივაციით მზად ვარ კვლავ მივიღო მონაწილეობა ახალ საგრანტო პროგრამებში და ახალი შესაძლებლობები გამოვიყენო ჩემი ახალი მიზნების ხორცშესასხმელად. დაინტერესების შემთხვევაში მზად და ხელმისაწვდომი ვარ ელ-ფოსტის: gurgenidzeana00@gmail.com და ჩვენი ფეისბუქ გვერდის “Hotel in Racha Mero” საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის