გამარჯობა,
მე ვარ ტარიელ ჩუბინიძე, ჭიათურის მუნიციპალიტეტის სოფელ ქვაციხედან, პროფესიით აგრონომი, ჩაის მწარმოებელი და ქვაციხის რაიკოოპერატივის თავმჯდომარე. ჩემს ისტორიას მოგიყვებით და ვფიქრობ საინტერესო და მოტივაციის მომცემი იქნება სხვა მეწარმეებისთვის.
მეჩაიეობას ჩვენ წლებია მივსდევთ, დაახლოებით 10 ჰექტარზე გვქონდა ჩაი გაშენებული და ესეც იყო ერთ-ერთი მთავარი მიზეზი ჩვენსა და GRETA პროექტს შორის ურთიერთობის დაწყებისა. სულ თავიდან რომ მოვყვეთ პროექტის შესახებ -ჭიათურის სოფლის მეურნეობის საკონსულტაციო ცენტრმა შეგვატყობინა თავიდან, შემდეგ ჩავედით და პროექტი დავწერეთ, შემდეგ უკვე გრეტას წარმომადგენლები თვითონაც ჩამოვიდნენ ჭიათურაში, გვქონდა შეხვედრა და დავიწყეთ ერთობლივის მუშაობა პროექტის ფარგლებში.
საკვანძო მომენტი იყო ევროკავშირის, შვედეთის და ავსტრიის მხარდაჭერით მიღებული დახმარება, უფრო დეტალურად რომ მოგიყვეთ -დაგვეხმარნენ დანადგარების შეძენაში, თანადაფინანსება იყო 70/30 ზე , ჩაის ფოთლის გადამამუშავებელი დანადგარებზეა საუბარი, სამგნობი აპარატები, როლერები, საფერმენტაციო აპარატი და საშრობი აპარატები. შემდეგ თვითონაც ჩამოვიდნენ და გაგვამართინეს ეს დანადგარები, რაც ნამდვილად მნშვნელოვანი იყო. ასევე ჩაგვიტარეს ტრენინგები და იქ მიღებული ინფორმაცია დღემდე გვადგება პრაქტიკულ საქმიანობაში.
ამის შემდეგი და მნიშვნელოვანი ეტაპი იყო საზღვარგარეთ, დუბაიში, საერთაშორისო გამოფენაზე ჩვენი ჩაის წარდგენა. ჩემი შვილი იმყოფებოდა, ლაშა ჩუბინიძე, რომელიც ასევე ჩვენი კოოპერატივი წევრია. ჩვენმა ჩაიმ დიდი მოწონება დაიმსახურა და შეიძლება ითქვას რომ საზღვარგარეთის ბაზარი და უცხოური საქმიანი კაშირები ნამდვილად არის ქართული პროდუქციისთვის უდიდესი შესაძლებლობა.
ამით GRETA-ს დახმარება არ დასრულებულა, ადგილზეც გვეხმარება, ბრენდი გაგვაკეთებინა, ამჟამად ვართ ბიოსერტიფიცირების პროცესში და ვფიქრობთ წლის ბოლოს მივიღებთ ბიო სერტიფიკატს და ეს უკვე იქნება მყარი საფუძველი ჩვენი ბიო ჩაის საზღვარგარეთ გასატანად.
ბრენდირება, დანადგარები და ბიო პროდუქციის ხარისხზე მუშაობა არის წარმატების საფუძველი და რომ არა გრეტას დახმარება ჩვენ ჩვენი რესურსებით ვერ განვვითარდებოდით. მითუმეტეს იმ კუთხით რომ მეჩაიეობის ტექნოლოგიურ დარგებში ჩვენ ძველი მეთოდები გვქონდა და ვეღარ ვიღებდით სასურველი ხარისხის პროდუქტს. თანამედროვე უნარების შესწავლამ კი საგრძნობი შედეგი მოგვცა, ამიტომ მეწარმე მუდმივად უნდა ეცნობოდეს და სწავლობდეს ახალ-ახალ ტექნოლოგიებს.
სატრაბახოდ არ ვამბობ მაგრამ აღნიშნული დახმარების შედეგები თვალსაჩინოა და გეტყვით კონკრეტულ ციფრებსაც: გრეტას ფინანსური მხარდაჭერით შეძენილმა აპარატურამ სურათი შეცვალა, გავზარდეთ მოსავლიანობა და თუ ადრე 4 ჰექტრიდან ვაწაერმოებდით 500 კილოგრამს, დღეს უკვე ერთ ჰექტარზე ვამზადებთ 500 კილოგრამს, 4- ჯერ გაიზარდა რაოდენობა და ასევე გაიზარდა ხარისხიც როგორც ზემოთ უკვე გითხარით.
დასასრულს გეტყვით რომ დონორების დახმარებამ გზა გაგვიზხსნა ახალი გეგმებისკენ და უახლოეს მომავალში ვგეგმავთ გავზარდოთ ბიო ჩაის წარმოება და მიღებული გამოცდილებით ვფიქრობთ მოცვის პლანტაციების გაშნებასაც. ამიტომ მზად ვართ ახალი საქმიანი შემოთავაზების თუ პროექტების შემთხვევაში სათანამშრომლოდ და საკონტაქტოდ ღია ვართ ტელეფონის, მეილის და სოც ქსელების მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის