გამარჯობა,
მე გახლავართ კახაბერ ორბელი, ამბროლაურის მუნიციპალიტეტის სოფელ ჭრებალოდან, პროფესიით ინჟინერი და მეფუტკრე. მეფუტკრეობას 13 წლიდან მივყვები და ჩემი ძირითადი საქმიანობაა, რომელსაც მამაჩემი ეწეოდა და შეიძლება ითქვას შთამომავლობით გადმომეცა. ამიტომაც ლოგიკურია რომ ამ სფეროში საკმაოდ დიდი გამოცდილება და კომპეტენცია გამაჩნია, თუმცა დამატებით ცოდნაზე და დამატებით დახმარებაზე ჩვენ ქართველ მეწარმეებს არ გვაქვს უარის თქმის ფუფუნება. რადგან დამატებითი დახმარება ვახსენე, მოდით მაშინ მოვყვეთ უფრო ადრე პერიოდიდან როდესაც მეგობარმა მომაწოდა ინფორმაცია პროექტ GRETA-ს შესახებ, რომელიც ევროკავშირის შევედეთის და ავტრიის ერთობლივი ინიციატივით იწყებოდა, ზოგადად ჩვენ მეწარმეები რაიონში მსგავს სიახლეებს ერთმანეთს ვუზიარებთ.
პროექტის დაწერის შემდეგ ცოტა რთული გზის გავლა მომიწია, თავიდან ბიო წარმოებაზე უარი მეთქვა და ტურიზმზე გადამიტანეს საბუთები, მაგრამ მერე ისევ ბიო წარმოებაზე მომაბრუნეს და რა ხარვეზებიც მქონდა იმის გამოსწორება მირჩიეს და ამის შემდეგ გავხდი ბენეფიციარი.
ჩემს მიერ მოთხოვნილი დახმარება აბსოლუტურად გააზრებული და წარმოების საჭიროებიდან გამომდინარე იყო და სრულყოფილად ვიყენებ, კერძოდ ესენი იყო: თაფლის გადასამუშავებელი ციბრუტი, სანთლის გადამამუშავებელი დანადგარი, რომელიც ამავე დროს კლავს ბაქტერიებს და ამზადებს სანთელს მაღალ ტემპერატურაზე, ფიჭიდან სანთლის ასათლელი აპარატი, სანთელს რასაც ვაწარმოებ მე თვითონ მჭირდება, რადგან დიდი საფუტკრე მეურნეობა მაქვს. აღნიშნულმა დანადგარებმა გაზარდა მუშაობის სიჩქარე და თაფლის ხარისხი, აი მაგალითად ციბრუტი რაც უფრო სწრაფად მუშაობს, მით უფრო მალე გადაამუშავებს თაფლს, შესაბამისად დროულად მიმდინარეობს საფუტკრეში სამუშაოები და გამარტივებულია დაავადებებთან ბრძოლაც, რადგან ეს თუ დროში გაიწელა შეიძლება ჩვენ დავაგვიანოთ ფუტკრის დამუშავება პრეპარატებით და ამან გამოიწვიოს მთელი საფუტკრის განადგურება, აქ ორი კვირა წყვეტს ამ საკითხს. ასევე დაჩქარებული პროცესი გვაძლევს საფუძველს, რათა გვქონდეს ოჯახების გამრავლების სტრატეგია.
პროექტ GRETA-ს ფარგლებში ასევე აუცილებლად უნდა გამოვარჩიო ტრენინეგბი, სადაც მიღებული ინფორმაცია და ცოდნა, შეიძლება ითქვას რომ ინსტიტუტის დამთავრების ტოლფასი იყო. აი მაგალითად მე 4 დღეში ძალიან დიდი ინფორმაცია მივიღე, ბიზნესის წარმოებაზე, ბრენდირებაზე, როგორც გაიტანო პროდუქცია ექსპორტზე ა.შ.
დონორების განხორციელებული დახმარება და მიღებული ცოდნა, დამატებითი მოტივაციაა რომ გადავიდე განვითარების შემდეგ ეტაპზე, მოვამრავლო ოჯახები, ჩამოვასხა თაფლი, მქონდეს ბრენდირება და გავიტანო პროდუქცია საზღვარგარეთ, მოგეხსენებათ მე გადამამუშავებელი საწარმოც მაქვს და ჩამოსასხმელიც. აქვე აუცილებლად უნდა ვთქვა რომ პროექტის ფარგლებში მიღებული დანადგარების შედეგად წარმოება გაიზარდა 2.5-ჯერ, ეს თაფლის სწრაფად გადამუშავებამ ქნა, რაც დამეთანხმებით რომ სასიამოვნო წარმატებაა.
სამომავლო გეგმებში აუცილებლად ბრენდირება, უცხოეთის ბაზარზე გატანა და ბიო სერტიფიცირების პროცესში ჩართვაა, როდესაც რეალურად ბიო პროდუქციას აწარმოებს მეწარმე ამას საერთაშორისო სტანდარტით აღიარებული ხარისხის ნიშნით განმტკიცებაც აუცილებლად ჭირდება. ასევე დამწყებ მეწარმეებს მინდა ვუთხრა, რომ საქართველო ბიო წარმოების კუთხით ძალიან პერსპექტიულია და ბიო წარმოებაზე მოახდინონ სწორება. შემდეგ უკვე სწორი დაგეგმვის სწორი სტრატეგიის და სწორი გათვლების ქონის შემთხვევაში წარმატება აუცილებლად მოვა.
ახალი ინიციატივებისა და საქმიანი კავშირების დასამყარებლად მუდმივ მზაობას ვაცხადებ და დაინტერესების შემთხვევაში ელ-ფოსტის და ფბ გვერდ „ორი ბელის“ მეშვეობით შეგიძლიათ დამეკონტაქტოთ.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის