გამარჯობა,
მე გურამ საღარაძე ვარ, მეღვინე, მეწარმე და აგრობიოტექნოლოგი, ჩემი ამჟამინდელი საქმიანობის ადგილი გახლავთ ულამაზესი რაჭა, ამბროლაურის რაიონი, სოფელი სადმელი, სადაც გვაქვს ბუტიკური ტიპის საოჯახო სასტუმრო Wine Space” და ასევე გლემფინგი. მიუხედავად იმისა რომ მე წარმოშობით რაჭიდან ვარ, მიწა არ მქონდა აქ და გადავწყვიტე მევენახეობა-მეღვინეობა, რომელითაც მანამდეც ვიყავი დაკავებული, რაჭაშიც გამეგრძელებინა. საქმიანობიდან გამომდინარე ასევე აუცილებელი გახდა ადგილზე რაჭაში სახლის ქონა და დიდი ძებნის შემდეგ ამ საოცარ ადგილს მივაგენით მე და ჩემმა მეუღლემ. ხელი შევავლეთ ასწლოვან ხის რაჭულ სახლს, გავმართეთ და საცხოვრებლად ძალიან კომფორტული გახდა, რამაც მოგვცა იდეა რომ ბავშვები ჯანსაღ გარემოში აღგვეზარდა და აქეთ გადმოვსულიყავით. შემდეგ იყო უკვე მეგობრების სისტემატიური შეხსენება, ყველა მათი სტუმრობის შემდეგ, რომ აქ ჩვენს ძველ სახლში კარგი იქნებოდა საოჯახო სასტუმროს გაკეთება, რამაც შედეგი გამოიღო და მართლაც დავიწყეთ და გავაკეთეთ სასტუმრო.
დამწყები ბიზნესებისთვის მდგრადობის მოსაპოვებლად ნებისმიერი დახმარება ყოველთვის მნიშვნელოვანია. ჩემს შემთხვევაში სწორ დროს და ზუსტ ეტაპზე გამოჩნდა პროექტი გრეტა რომლის შესახებაც ინტერნეტის მეშვეობით შევიტყვე. მიმზიდველი იყო ის რომ რაჭის რეგიონზე ვრცელდებოდა და ბიო მიმართულებას ასევე რომ დაამატეს სასტუმროს კომპონენტი და ბიუჯეტი, რომელიც სხვა პროექტებთან შედარებით ფუნქციონალურად გამოიყურებოდა.
ევროკავშირის, შვედეთის და ავსტრიის დახმარებით, შესაძლებობა მომეცა დამემატებინა 2 გლემფინგ კოტეჯი, ეზოში მომეწყო მინი კინოთეატრი და რაც უმნიშვნელოვანესი იყო, დამემატებინა სარესტორნო სივრცე და აღმეჭურვა შესაბამისი ინვენტარით რაც რესტორნის გამართული მუშაობისთვის იყო საჭირო.
ამ ერთი შეხედვით მცირე დახმარებამ კიდევ უფრო მეტი მოტივაცია და სურვილი მომეცა ვაკეთო საქმე ისეთ რეგიონში, სადაც მარტივი არაა საქმის კეთება, გეოგრაფიული და ლოჯისტიკური ფაქტორებიდან გამომდინარე. ვფიქრობ რომ გაწეულმა დახმარებამ ბიზნესს სიძლიერე შესძინა, ახალი სერვისი დაგვემატა რესტორნის სახით და ეს საკმაოდ ცნობადს გახდის მთლიანად ჩვენს კომპლექსს.
მსგავსი პროექტების მიერ ფინანსური მხარდაჭერა ზოგადად რეგიონისთვისაა კარგი, ხელს უწყობს რაჭის ცნობადოდის გაზრდას და ეს სტიმული ნათლად იგრძნობა, ჩვენც სხვა მეწარმეებისთვის სტიმულის მიმცემები ვართ, რომელთაც ერთ რჩევას მივცემ საკუთარი გამოცდილებიდან, რომ იშრომონ შეუპოვრად და არასოდეს დანებდნენ!
გეგმებს რაც შეეხება, მინდა რომ საქართველოში ვიყო მყარად ბიზნესში ფეხშედგმული და მიუხედავად საზღვარგარეთიდან შემოთავაზებებისა, არსად არ ვაპირებ წასვლას და ვფიქრობ რამდენიმე წელიწადში ერთ-ერთი წარმატებული ბიზნესის მფლობელი ვიქნები რაჭაში.
ახალი საქმიანი და საინტერესო თანამშრომლობისთვის ღია და მზად ვარ და დაინტერესების შემთხვევაში ყველა ბუქინგ საიტზეა ჩვენი ინფორმაცია და ასევე ელ-ფოსტის და ტელეფონის საშუალებით იქნება შესაძელებელი ჩვენთან დაკონტაქტება.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის