გამარჯობა,

მე გახლავართ გოგი მუშკუდიანი, ლეჩხუმიდან, ცაგერის რაიონის სოფელ ლასურიაშიდან. პროფესიით ტარქტორის მემანქანე ვარ და სხვადასხვა ტექნიკაზე ვმუშაობ, ასევე მივსდევ მესაქონლეობას, მესიმინდეობას, ხვნა-თესვას და ყველაფერს რაც სასოფლო-სამეურნეო საქმიანობაში შედის.  დღევანდელი სასაუბრო თემა კი კონკრეტულად მესაქონლეობა იქნება და გაგიზიარებთ ჩემი მცირე წარმატების ამბავს, რომელში მნიშვნელოვანი როლი ევროკავშირის, შვედეთის და ავსტრიის ერთობლივი ძალისხმევით დაფინანსებულმა კომპანია GRETA-მ შეასრულა. 

პროექტის შესახებ ჩემი მეგობრისგან შევიტყვე, გეტყვით რომ ამ ჩემს მეგობართან ერთად ვარ სასოფლო-სამეწარმეო საქმიანობაში ჩართული, კოოპერატივშიც ერთად ვართ, მან მირჩია რომ გავცნობოდი საგრანტო პროგრამას და მონაწილეობა მიმეღო კიდეც. საბოლოოდ პროექტის დაწერაშიც დამეხმარა თუმცა ვერ გავიმარჯვე. მარცხმა არ შემაშინა, გავითვალისწინე წინა შეცდომები, კიდევ ვცადე, ამჯერად გამიმართლა და გავიმარჯვე. 

დონორების დახმარების შედეგად მივიღე ყველა საჭირო მასალა ფუნდამენტიდან დაწყებული სახურავის მასალით დამთავრებული, აბსოლუტურადა ყველა მასალა მოგვიტანეს რაც ღორების ფერმის ასაშენებლად იყო საჭირო. ასევე ფერმის შიდა ინფრასტრუქტურისთვის მოსაწყობად საჭირო რაც კი იყო, ყველაფერი უზრუნველყო გრეტა პროექტმა. ჩემი მონაწილეობა იყო 20% და ისიც აშენების ნაწილში, აქაც მოხერხებული გამოსავალი ვიპოვე, მე თვითონ რადგან მეხერხება ხელსაქმე, ჩემით ავაშენე ეს ფერმა, ჩემი შრომა იყო ჩემი შეტანილი კონტრიბუცია და ესეც არაჩვეულებრივი შესაძლებლობა იყო. 

შენობის დამთავრება და გამართვა უკვე ნიშნავდა ჩვენებური ლეჩხუმური ღორის მყარი მოშენების საფუძველს, სწორედ ეს იყო კიდეც მიზანი ჩემი პროექტის, თუმცა აქ იყო კიდევ ერთი მნიშვენლოვანი ფაქტორი-ცხოველებისთვის საკვების გადასამუშავებელი ტექნიკა. გადავწყვიტეთ კვლად გვეცადა ბედი დავწერეთ პროექტი და ამჯერადაც გაგვიმართლა. პრინციპში ლოგიკურიც იყო, ფერმის დაფინანსების შემდეგ, უკვე იქ არსებული ცხოველების გასამრავლებლად საჭირო იყო საკვების გადამუშავება. სიმინდის ასაღები კომბაინი, რომელიც შევიძინეთ, ნამდვილი შვება იყო და აგიხსნით რატომ; ყანაში რომ მიდის კომბაინი ჭრის სიმინდს, ჩალა იყრება ძირს, აცლის ტაროს და გარჩეული შედის სპეციალურ სათავსო ბუნკერში, შემდეგ შეგიძლია მიადგე სატვირთო ტრანსპორტით და გადაცლი ამ გასუფთავებულ მოსავალს, თუ ჩალა გენდომება გაყვები პრესით და პრესებს გააკეთებ, ღორებისთვის ვიყენებ მაგალითად სიმინდის ტაროს, საქონლისთვის ჩალის პრესს. ეს ყველაფერი ძალიან დიდი შევაღათია ნამდბვილად დამეთანხმებით. 

აქ მთავარი ფაქტორი ისაა კიდევ რომ ჩემი სიმინდი ეკოლოგიურად სუფთა, ბიო წარმოებისაა, ყველანაირი სასუქების და დანამატების გარეშე, შესაბამისად ჩემი ფერმის ღორი ბიო სიმინდზე გაზრდილი ღორია, რაც ისედაც ცნობილ ლეჩხუმურ ლორს კიდევ უფრო მეტ ხარისხს მატებს. 

რომ შევაჯამოთ დახმარების შედეგად გამოადვილდა შრომა, სიმინდის მოსავალი გაიზარდა 5-ჯერ, ასევე 5-ჯერ გაიზარდა ღორების რაოდენობაც და ეს ყველაფერი ახლო მომავალშივე ქმნის ღორების რაოდენობის კიდევ უფრო გაზრდის მყარ გარანტიას. 

ბოლოსკენ სხვა მეწარმეებს ვეტყოდი რომ აუცილებლად მოიძიონ ინფორმაცია ისეთ პროექტებზე როგორიც გრეტაა და აუცილებალდ ჩაერთონ, ვინაიდან ჩვენნაირი მცირე მეწარმეებისთვის, მსგავსი დახმარებები ფუნდამენტური მნიშვნელობისაა. 

აქვე ჩემს გეგმებსაც გაგიმხელთ; გაფართოებას ვგეგმავ და მინდა მარცვლეული კულტურების მოყვანა აღავდგინო ლეჩხუმში, ქერი და ხორბალი კიდევ უფრო გააძლიერებს მესაქონლეობას და აქვე ვიტყვი რომ ხორბლის უძველესი ჯიშები მახა და ზანდური სწორედ ლეჩხუმიდანაა წარმოშობით და ჩემი ოცნებაა აქ ამ ჯიშების მოყვანა. 

ჩემი მიზნების და გეგმების განსახორციელებლად სიამოვნებით ჩავერთვებოდი ახალ პროექტებსა თუ ინიციატივებში და დაინტერესების შემთხვევაში ჯერჯერობით მხოლოდ ელ ფოსტის მეშვეობით ვარ საკონტაქტოდ ხელმისაწვდომი.