გამარჯობა,
მე გიორგი ორდინიძე ვარ, საქართველოს ულამაზესი კუთხე რაჭიდან, კერძოდ ონის მუნიციპალიტეტის სოფელ ღარიდან. პროფესიით იურისტი ვარ და ასევე ვეწევი მეფუტკრეობას უკვე 25 წელია. ასევე ვარ ტრენერი, ვატარებ ტრენინგებს სხვა მეფუტკრეებისთვის ეკოლოგიურად სუფთა თაფლის წარმოებაზე და ისედაც, მე თვითონაც ბოლო პერიოდში ბიო წარმოებით ვარ დაინტერესებული. სწორედ ბიო მიმართულება გახდა საერთო დამაკავშირებელი ჩემსა და GRETA პროექტს შორის, რომელიც ევროკავშირის, შვედეთის და ავსტრიის ფინანსური მხარდაჭერით ხორციელდება საქართველოს მაღალმთიან რეგიონებში.
გრეტას შესახებ რაიონში შევიტყვე, რადგან მეც ტრენინგების მიმართულებაში ვარ ჩართული მსგავს სიახლეებთან მეტი ყურადღებით ვარ ხოლმე და თან ონი პატარაა და მეწარმეები სასარგებლო ინფორმაციას ყოველთვის ვუზიარებთ ერთმანეთს. რამდენიმე ეტაპის წარმატებით გავლის შემდეგ გავხდი ბენეფიციარი და შეიძლება ითქვას ჩემს საქმიანობაში ახალი ეტაპი დაიწყო, რადგან მივიღე თაფლის წარმოებისთვის აუცილებელი ისეთი დანადგარები რამაც შრომა გაამარტივა და ხარისხი გაზარდა. ესენი იყო: ციბრუტის, იგივე თაფლის გამოსაწური აპარატი, ფიჭის ასათლელი მაგიდები, დეკრისტალატორი, სანთლის გადასადნობი, თვითონ სკები და ბოლოს უჟანგავი ჭურჭელი თაფლის შესანახად. ამ ყველაფერმა დროში დააჩქარა წარმოების პროცესი და შესძინა მდგრადობა და რაც მთავარია გააჩინა განვითარების და გამრავლების მიზეზი, მეც დახმარების შემდეგ უკვე გავზარდე რამდენიმე ძირით ფუტკარის რაოდენობა.
უნდა გამოვყო ტრენინგებზე მიღებული მნიშვნელოვანი ინფორმაცია, რომელიც დამეხმარა საქმის სწორად დაგეგმვასა და წარმართვაში. მაგალითად როდესაც გაქვს სურვილი გადახვიდე ბიო წარმოებაზე მაგრამ არ იცი რითი დაიწყო, ან მერე როგორ განავითარო, სწორედ აქ მიღებულმა ინფორმაციამ მომცა იმ ელემენტარული საფუძვლების ცოდნის შესაძლებლობა, რომელიც პროცესის თანმიმდევრულად წარმართვისთვისაა საჭირო.
ზოგადად ჩვენთან მეფუტკრეობაში ბევრი პრობლემებია, ბიო სერტიფიცირებას ვერ ვახერხებთ, რადგან ელემენტარული ბიო ფიჭა არ იწარმოება, ან თუ იწარმოება, მისი დადასტურება აქ ვერ ხდება და საჭიროა საზღვავრგარეთ გაგზავნა, რომელიც არც თუ ისე პატარა თანხებთანაა დაკავშირებული და მეწარმეებს არ აქვთ საშუალება. ჩემს შემთხვევაშიც ასეა, ჩემი არის რეალურად ბიო ფიჭა, მაგრამ ვერ დავამტკიცებ. შესაბამისად მეც მხოლოდ საწყისი რამდენიმე ეტაპი მაქვს გავლილი ისიც ელკანას ფარგლებში, მაგრამ ეს საკმარისი არაა. თუმცა ეს ჩემი გეგმისთვის, ბიო წარმოებაზე გადასვლასთან დაკავშირებით, ხელის შემშლელად ვერ გამოდგება. ასევე ერთ პრობლემაზე გავამახვილებ ყურადღებას, ეს გახლავთ თაფლის წარმოებისას ანტიბიოტიკების გამოყენება, თუმცა სიამაყით ვიტყვი რომ ონის რაიონის მეფუტკრეებს ჩემს მიერ ჩატარებული ტრენინგების საშუალებით საერთოდ ამოვაღებინე ხმარებიდან ანტიბიოტიკები.
ბიო მიმართულება არის ყველაზე პერსპექტიული და დასაფასებელი, მთელ მსოფლიოში იზრდება მოთხოვნა ეკოლოგიურად სუფთა პროდუქტებზე და სხვა მეწარმეებსაც ვურჩევდი მეტი დრო დაუთმონ მას. მართალია ბიო წარმოებისას რაოდენობა იმდენი აღარ არის, მაგრამ სამგიეროდ იმატებს ხარისხი. ჩემი უახლოესი გეგმებიც ხარისხიანი თაფლის წარმოებას უკავშირდება, რომელიც აუცილებლად მოხვდება ევროპის ბაზარზე. ამას კი მეტი ცოდნითა და ცოდნიდან გამომდინარე თამამი ნაბიჯების გადადგმით მივაღწევ. ამ ყველაფრის საფუძველი კი სწორედ GRETA პროექტმა გააჩინა.
როგორც ხედავთ გეგმები და მიზნები რეალურია, რომელიც მცირე წარმატებამ გამოიწვია და მზად ვარ ახალი გამოწვევბისთვის და თანამშრომლობისთვის. დაინტერესების შემთხვევაში ღია ვარ საკომუნიკაციოდ ელ-ფოსტისა და ტელეფონის საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის