გამარჯობა,
მე გახლავართ ლაშა ჯოხაძე, რაჭიდან. საქართველოს იმ ერთ-ერთი საოცარი მაღალმთიანი რეგიონიდან, სადაც მრავალფეროვანი ტურისტული პროდუქტების განვითარებისთვის დიდი პოტენციალია. ჩვენი კუთხის ლამაზი ბუნებიდან და მთიანი რელიეფიდან გამომდინარე, მე და ჩემმა ძმამ - გიორგი ჯოხაძემ, გადავწყვიტეთ საცხენოსნო ტურიზმის საქმიანობა წამოგვეწყო და დავაარსეთ საცხენოსნო კლუბი „ხოვეთი“. ჩვენ გვჯერა, რომ როდესაც საქმის გაკეთება გულით გინდა, აუცილებლად გამოვა. ამის ნათელი მგალითი ჩვენი საქმიანობაა, რომელიც ერთობლივად შეგროვებული თანხით შეძენილი 8 ცხენით დავიწყეთ და დღეს უკვე საცხენოსნო ტურებისთვის სრულად აღჭურვილი 20 ცხენი გვყავს.
დღევანდელი წარმატებული საქმიანობა განაპირობა ევროკავშირის, შვედეთის და ავსტრიის ერთობლივმა დახმარებამ პროექტ GRETA -ს სახით. თავდაპირველად, ინფორმაცია ინტერნეტში ვნახეთ და დავიწყეთ მოცემული ინსტრუქციების მიხედვით აპლიკაციის ზედმიწევნით მომზადება. გვჯეროდა, რომ ჩვენი საყვარელი საქმის განვითარებისთვის საჭირო საბუთების სწორი მომზადების შემდეგ, სასურველი შედეგი ნამდვილად დადგებოდა. მართლაც გაგვიმართლა, და გავხდით საგრანტო პროგრამის ერთ-ერთი გამარჯვებული. დახმარების ფარგლებში შევიძინეთ საცხენოსნო ტურისთვის ინვენტარი და სრულყოფილი აღჭურვილობა, რომელიც მოიცავდა 12 საველე აღჭურვილობას, კარვებს, საძილე ტომრებს, საველე გაზქურებს, პირსაბანებს და ასევე, ცხენების სრულ აღკაზმულობას.
ამ ყველაფერმა ჩვენი საცხენოსნო ტურები კომფორტული და სრულფასოვანი გახადა. ასევე, მოიმატა ვიზიტორების რაოდენობამაც, რადგან ახლა უკვე დიდ ჯგუფებსაც შეგვიძლია მოვემსახუროთ. შეიძლება თამამად ვთქვათ, რომ დღეს ჩვენ სტუმრებს დაუვიწყარი სათავგადასავლო და საცხენოსნო ტურის სრულ მომსახურებას ვთავაზობთ.
ჩვენი საცხენოსნო ბანაკი მდინარე ლუხუნის ნაპირას, ხოვეთში მდებარეობს, რომელიც რეგიონში საკმაოდ ცნობილი ერთ-ერთი ძველი ადგილია. დონორების მხარდაჭერამ ეს ადგილი გამოაცოცხლა და საინტერესო ტურისტული ფუნქციაც შესძინა. სამომავლოდ დაგეგმილი გვაქვს ამ საქმიანობის კიდევ უფრო გამრავალფეროვნება, სადაც მოვიაზრებთ ეკოლოგიური გარემოს შენარჩუნებით კოტეჯების აშენებას და მზის პანელებით დასასვენებელი კომფორტული ინფრასტრუქტურის მოწყობას. ასევე, გვინდა დავამატოთ ჯიპ ტურებიც, კემპინგი და სხვადასხვა სათავგადასავლო ტურებიც. საკმაოდ იმედიანად ვართ ჩვენი გეგმების მიმართ, რადგან რაჭის ზღაპრული ბუნება ამის საშუალებას ნამდვილად იძლევა.
ამ პერსპექტივას ვერ დავინახავდით, რომ არა ევროკავშირის, შვედეთის და ავსტრიის მხარდაჭერა იმ გარდამტეხ მომენტში, როცა ეს ჩვენ ძალიან გვჭირდებოდა. სწორედ ამ ხელშეწყობამ მოგვცა ბიძგი უფრო დიადი გეგმებისკენ. როცა ვადარებ ჩვენი საქმიანობის დატვირთვას პროექტში მონაწილეობამდე და შემდგომ, დაახლოებით 3-ჯერ მეტი ტურისტების მიღება შევძელით და 2,5 ჯერ გავზარდეთ თოთო ჯგუფის მოცულობა, ეს ჩვენთვის ძალიან ბევრს ნიშნავს. მინდა გავუზიარო ჩემი რჩევა მაღალმთიანი რეგიონის მომავალ მეწარმეებს, არასოდეს შეუშინდნენ სირთულეებს და მიიღონ ისინი, როგორც გამოწვევა. ამასთანავე, აუცილებელია უყავრდეთ თავისი საქმიანობა და ჯეროდეთ, რომ ამ მიდგომით წარმატება გარდაუვალია.
ჩვენი გეგმების სისრულეში მოსაყვანად, როგორც საცხენოსნო ტურების გაფართოების მიზნით, ასევე დამატებითი მომსახურების შეთავაზებებისთვის, მზად ვართ ახალ საინტერესო ინიციატივებთან თანამშრომლობისთვის. დაინტერესების შემთხვევაში ჩვენი მოძიება შეიძლება ფეისბუქ გვერდის მეშვეობით, სახელად - Horses tour in racha საცხენოსნო ტურები რაჭაში
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის