![](uploads/news/65318cb540f1a2.00583500.jpg)
გამარჯობა,
მე არჩილ კერესელიძე ვარ, საქართველოს ზღაპრული რეგიონიდან, რაჭიდან. კერძოდ, ამბროლაურის მუნიციპალიტეტის სოფელ სადმელიდან. პროფესიით გახლავართ ეკონომისტი, თუმცა ჩემი საქმიანობა მასპინძლობის და მევენახეობა-მეღვინეობის სექტორებს უკავშირდება. ჩემი ოჯახი ფლობს სახლ-სასტუმროს სადმელში და ამასთანავე მცირე ვენახს, საიდანაც სტუმრებს ადგილობრივი ღვინით ვუმასპინძლდებით. ჩვენ მუდმივად ვცდილობთ გავაუმჯობესოთ მომსახურება და საუკეთესო მასპინძლები ვიყოთ, როგორიც ჩვენს ტრადიციებს შეესაბამება. მიზნის მისაღწევად, ყოველთვის ვეძებთ ახალ შესაძლებლობებს, თანამედროვე უნარ-ჩვევების შეძენა იქნება ეს თუ სხვა ტიპიც მხარდაჭერა, რომელიც ჩვენს ქვეყანაში საბედნიეროდ არსებობს და ხელმისაწვდომია.
ევროკავშირის, შვედეთის და ავსტრიის ერთობლივი ინიციატივის, პროექტ GRETA-ს შესახებ, ინტერნეტის საშუალებით, შვილმა და რძალმა შეიტყვეს და ჩვენც გაგვიზიარეს. თვითონ საზღვარგარეთ ცხოვრობენ, მაგრამ თვალყურს ადევნებენ რეგიონში მიმდინარე მოვლენებს. მე და ჩემი მეუღლე აქ ვცხოვრობთ და ყოველთვის ვცდილობთ ფეხი ავუწყოთ მათი განსხვავებული იდეების განხორციელებას და მაქსიმალურად ვიხარჯებით ამისთვის.
საქმიანობა დიდი ხნის დაწყებული გვქონდა, როცა შევიტყვეთ პროექტ GRETA-ს შესახებ, რომლის მხარდაჭერამ შეიძლება ითქვას, რომ ახალი სუნთქვა შთაბერა ჩვენს საქმიანობას. საგრანტო პროგრამაში გამარჯვების შედეგად, გადმოგვეცა სასტუმროს და რესტორნის აღჭურვილობა და თუ აქამდე საქმის კეთებას არსებული შეზღუდული რესურსებით ძლივს ვახერხებდით, ახლა საქმიანობამ უკვე გამართული მცირე ბიზნესის ფორმა მიიღო და უკვე განვითარების სხვა ეტაპზე გადასვლა დავიწყეთ.
ჩვენი სასტუმრო და რესტორანი არა მხოლოდ რაჭაში, არამედ რეგიონის გარეთაც დიდი ხანია ცნობილია. აქამდე ჩვენი პრობლემა იმაში მდგომარეობდა, რომ სტუმრის მისაღებად მოსამზადებელ სამუშაოებს საკმაოდ დიდხანს ვანდომებდით, რადგან შესაბამისი საოპერაციო დანადგარები არ გვქონდა. ახლა უკვე, დონორების მხარდაჭერით ჩვენი მასპინძლობის შესაძლებლობა გაიზარდა და შესაბამისად დატვირთვაც. სერვისიც გავაუმჯობესეთ და შიდა ინფრასტრუქტურის უკეთ მოწყობისთვის გადავდგით ნაბიჯები.
ჩემი დაკვირვებით, წინსვლა მხოლოდ ჩვენს საქმიანობას არ ეხება. რეგიონში, ჩვენმა მეგობრებმა, მეზობლებმა თუ ნათესავებმა ცხადად დაინახეს, რომ შესაძლებელია გამართული საქმიანობის წამოწყება და რამდენიმე მონდომებული დამწყები მეწარმისთვის გავხდით სტიმულის მიმცემი. გარდა ამისა, ადგილობრივმა ხელისუფლებამ დაინახა, რომ ჩვენთან ტურისტების დაინტერესებამ და შესაბამისად ნაკადმა იმატა და მათი ხელშეწყობით გზის რეაბილიტაცია განხორციელდა. ფაქტიურად რეგიონი უფრო გამოცოცხლდა და აქ მცხოვრებ ხალხს უფრო მეტი სტიმული და იმედიც მოგვეცა.
აუცილებლად მინდა ხაზი გავუსვა იმ ფაქტს, რომ მსგავსი ტიპის პროექტები ჩემნაირი მეწარმეებისთვის არის საუკეთესო შესაძლებლობა მიიღონ როგორც მხარდაჭერა, აგრეთვე გაიზიარონ საერთაშორისო წარმატებული გამოცდილებები. ეს ყველაფერი მეწარმეებს ფეხზე წამოდგომაში და განვითარებაში ეხმარება.
რაც შეეხება ჩვენი საქმიანობის სამომავლო გეგმებს, აუცილებლად ვაპირებთ გაფართოებას. უკვე დაწყებული გავქვს ორი შენობის მშენებლობა, სადაც 10 ნომრიანი საოჯახო სასტუმრო იქნება. ასევე, ძველ რაჭულ ხის სახლში გვინდა მოვაწყოთ ეთნოსასტუმრო, რომელიც ავთენტურობით მეტ სტუმარს მოიზიდავს. მევენახეობის და სასოფლო მეურნეობის მიმართულებით გვინდა უფრო მეტი ეკოლოგიურად სუფთა პროდუქტი მოვიყვანოთ, რომლითაც ჩვენივე რესტორანს მოვამარაგებთ.
ჩვენი სამომავლო გეგმების ხორცშესხმისთვის მზად და ღია ვართ ახალი საქმიანი კავშირებისთვის. ჩვენი მოძიება ადვილად შეიძლება სოციალური გვერდის მეშვეობით შემდეგ ბმულზე: Sad Meli Winery • სად მელის მარანი
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის