გამარჯობა,
მე ლაშა ცარციძე გახლავართ, ჩაის მწარმოებელი და კოოპერატივ „მთის ჩაი“-ს წამყვანი წევრი ზემო იმერეთიდან, კერძოდ ჭიათურიდან. ამჟამად ჩაის ვაწარმოებთ ორ სოფელში: ნიგოზეთში და მეჩხეთურში. სიტყვა “ვაწარმოებთ” შემთხვევით არ მიხსენებია, ვინაიდან დღესდღეობით მართლაც რომ გამართული წარმოება გვაქვს დონორების დახმარებით. აქამდე სამწუხაროდ ბევრჯერ ყოფილა მოსავლის გაფუჭების საშიშროება, რადგან შესაბამისი დანადგარები არ გვქონდა, რაც შემაფერხებელი ფაქტორი გახლდათ ჩვენს საქმიანობაში.
ჩვენი ბიზნესის ე.წ წელში გამართვა,განხორციელდა ევროკავშირის, შვედეთის და ავსტრიის ერთობლივი პროექტ GRETA-ს მხარდაჭერის საფუძველზე. პროექტის შესახებ, ინტერნეტში გაზიარებული ინფორმაციით შევიტყვე. თავიდანვე დავინტერესდი, რადგან ბიო მეურნეობაში ჩართული მეწარმეებისთვის საგრანტო კონკურსის გამოცხადება იგეგმებოდა. დეტალური ინფორმაცია რეგიონურ საინფორმაციო შეხვედრებზე დასწრებით მივიღე. რის შემდეგაც დავწერე პროექტი, ზედმიწევნით მივყევი ინსტრუქციებს, გადავედი მომდევნო ეტაპებზე და ბოლო ეტაპზე საგრანტო კონკურსის ერთ-ერთი გამარჯვებულიც გავხდი.
საგრანტო კონკურსში გამარჯვებამ და დონორებისგან მიღებულმა მხარდაჭერამ შეიძლება ითქვას გარდამტეხი როლი ითამაშა ჩვენი კოოპერატივის განვითარებაში. ჩვენ მივიღეთ დანადგარები, ესენია: ჩაის საშრობი დანადგარი, საფერმენტაციო აპარატი, სამგნობი აპარატი და ასევე მივიღეთ კორკუშალების საშლელი დანადგარი, რომელიც შეწებებული ჩაის განცალკევებისთვის გამოიყენება. ერთი სიტყვით რომ აღვწერო ძალიან გაგვიმარტივდა მუშაობის პროცესი.
თქვენც რომ გაგიზიაროთ თუ რას ნიშნავს ჩვენი საქმიანობის „წელში გამართვა“ და უფრო თვალსაჩინო იყოს ევროკავშირის, შვედეთისა და ავსტრიის ფინანსური მხარდაჭერის მნიშვნელობა ჩვენთვის,, გეტყვით, რომ დანადგარების მიღებამდე გაგვიფუჭდა მოსავალი, მართალია მოსავლის დაკრეფა მოვასწარით, თუმცა ვერ მოვახერხეთ მისი სათანადო დამუშავება და სამწუხაროდ, მთელი შრომა წყალში ჩაგვეყარა. ამჟამად, დანადგარების მეშვეობით მოსავლის სწორად დამუშავება 5-ჯერ გაიზარდა და შესაბამისად შემცირდა გაფუჭებული ნედლეულიც. თუ დავუშვათ დანადგარების მიღებამდე ჩვენი წარმოება სრულ სეზონზე 100 კილოს შეადგენდა, ახლა, როცა სეზონი შეიძლება ითქვას რომ არც კი დაწყებულა, უკვე ვაწარმოეთ 200 კილო ჩაი. წარმოების ზრდასთან ერთად დავიწყეთ ბიო სტანდარტების დანერგვაც და 2024 წელს მოუთმენლად ველოდებით ბიოსერტიფიკატის მიღებას.
გარდა წარმოებისა, პროექტი მუდმივად გვეხმარებოდა ჩვენი პროდუქტის მარკეტინგშიც და სულ ვფიქრობდი, როცა ეს პროექტი დასრულდებოდა ნეტა ვისთვის უნდა მიმემართა როცა მსგავსი აქტუალური საკითხები გაჩნდებოდა. ამ ფიქრებში ვიყავი, როცა ტელეფონმა დარეკა და პროექტიდან შემატყობინეს, რომ იწყებოდა ტრენინგების სესიები, სადაც მეწარმეებს შეგვასწავლიდნენ ბიზნესის მართვის თანამედროვე ტექნიკებს და მარკეტინგს. დღეს მე ისიც ვიცი რა არის საჭირო ჩემი ბიზნესის მართვისთვის, გავიცანი მაღალკვალიფიციური სფეროს ექსპერტები და ახლა უკვე ვიცი როგორ ვიმოქმედო.
რომ შევაჯამოთ, გაწეული მხარდაჭერა ძალიან სწორად და მიზანმიმართულად იყო დაგეგმილი. საწყის ეტაპზე დონორების მხარდაჭერა მივიღე საწარმოო პროცესების გამართვისთვის, რადგან როგორც ზემოთ ვახსენე, აღნიშნულის გარეშე თავად პროდუქტი არ იქმნება. ამას მოყვა ის სარგებელი, რომ გამარტივდა შრომა და კოოპერატივის წევრებს უკეთესი მომავლის იმედიც გაგვიჩნდა. შემდგომი ეტაპი იყო სწავლა და იმ უნარ-ჩვევების გამომუშავება, რომელიც ჩვენ დამოუკიდებლად წინსვლაში და განვითარებაში დაგვეხმარება. აქ გაჩნდა იმ განცდის საფუძველი, რომ ჩვენს შრომას ნამდვილად აქვს აზრი.
ახლა მოტივაციაც და ხედვაც გვაქვს, რომ უახლოვეს მომავალში ჩვენი „მთის ჩაი“ ერთ-ერთი ძლიერი კომპანია გახდეს რეგიონში, მოგვიანებით კი საქართველოში და ნელ-ნელა აუცილებლად გავცდებით საზღვრებს უკვე მინიჭებული ბიო წარმოების სტატუსით.
მზად ვართ ვითანამშრომლოთ ყველა იმ პოტენციურ პარტნიორთან, პარტნიორთან, რომლებიც გაიზიარებენ წარმატებაზე ორიენტირებულ საერთო ამბიციებს და მიზნებს. დაინტერესების შემთხვევაში ჩვენ საკომუნიკაციოდ ხელმისაწვდომები ვართ შემდეგი ფბ გვერდის - „მაღალმთიანი იმერეთის ჩაი“-ს მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის