გამარჯობა,
მე შორენა პატარიძე ვარ, ამბროლაურის რაიონის სოფელ აბანოეთიდან. ჩემი ამჟამინდელი და შეიძლება ითქვას რომ საოცნებო საქმიანობა, არის მევენახეობა-მეღვინეობა, ისე პროფესიით ეკონომისტი ვარ. გულწრფელად გეტყვით, დღეს მე რომ გამართული მეღვინეობა მაქვს, ეს სწორედ ევროკავშირის, შვედეთის და ავსტრიის მხარდაჭერით განხორციელებულ პროექტ GRETA-ს დამსახურებაა.
თვითონ პროექტის შესახებ, ფერმერთა ასოციაციიდან შევიტყვე. ელექტრონული წერილი მივიღე ინფორმაციით, რომ იწყებოდა პროექტი, რომელიც რაჭის რეგიონსაც მოიცავდა.. შემდგომ დეტალური ინფორმაცია პროექტის ვებსაიტზე მოვიძიე. საფუძვლიანად გავეცანი პროექტის მიზნებს და საბედნიეროდ სრულად ეხმიანებოდა ჩემს სამომავლო გეგმებს. გადავწყვიტე, აუცილებლად მეცადა ბედი. გამოქვეყნებული ინსტრუქციის შესაბამისად დავწერე პროექტი, გავიარე ყველა ეტაპი და კონკურსში გამარჯვების შედეგად გავხდი პროექტის ბენეფიციარი.
რაც შეეხება მიღებულ დახმარებას, ერთი სიტყვით რომ აღვწერო ასე ჟღერს: უზარმაზარი! არ დაგიმალავთ და გეტყვით, რომ ფინანსური მხარდაჭერის გარეშე საერთოდ ვეღარ შევძლებდი საქმიანობის გაგრძელებას იმდენად რთული პერიოდი მედგა. ევროკავშირის, შვედეთის და ავსტრიის მხარდაჭერით, შევძელი გამეცოცხლებინა ბაბუას ვენახი. ასევე მივიღე ყველა საჭირო ტექნიკა, როგორც ვენახისთვის, ასევე მარნისთვის. დახმარების ფარგლებში ასევე შევიძინე ტრაქტორი. ჩემს შემთხვევაში, ტექნიკის შერჩევისას განსაკუთრებული აქცენტი იყო ჩემზე, ვგულისხმობ იმას, რომ ვინაიდან პირადად მე ვამუშავებ ვენახს და მაგალითად როდესაც ჯერი მიდგა ვენახის შესაწამლი აპარატის შერჩევაზე, მნიშვნელოვანი აქცენტი აპარატის სიმსუბუქეზე გაკეთდა, რომლის მოხმარება ქალისთვის მოსახერხებელი და მარტივია.
„პატარიძის რაჭული“-ს ღვინოებიდან განსაკუთრებული მოწონება აქვს ალექსანდროულისგან და მუჯურეთულისგან არასტანდარტულად დამზადებულ მშრალ ხვანჭკარას. ამისთვის მარნის დათბობა და სტაბილური ტემპერატურის შენარჩუნება იყო საჭირო. მიწევდა მარნის შეშის ღუმელით გათბობა და ღამეების თენება, რომ ტემპერატურა რეგულარურად შემემოწმებინა. დონორების დახმარებით გადმომეცა დიდი კონდიციონერი და ჩემი გამქანცველი ღამის თენებებიც დასრულდა.
განსაკუთრებულად მინდა ავღნიშნო, მარკეტინგის ნაწილში GRETA-ს პროექტის ფარგლებში გაწეულ მხარდაჭერაზე. პროექტის დაფინანსებით, გავიარეთ უამრავი საჭირო ტრენინგი და შევიძინეთ ფასდაუდებელი ცოდნა. გარდა ამისა, ექსპორტის მენეჯერი ინტენსიურად მუშაობდა ჩვენი ბიზნესის განვითარებაზე, კერძოდ საერთაშორისო ბაზრების ათვისებაზე. რჩევების გათვალისწინებით და საერთაშორისო გამოფენებზე მონაწილეობით ჩემს საქმიანობას ახალი პერსპექტივები გაუჩნდა. ვთვლი, რომ ჩვენნაირი პატარა მეწარმეებისთვის ყოველივე ეს ნამდვილად დიდი შესაძლებლობაა.
შეჯამებისკენ რომ წავიდეთ, როგორც ზემოთ აღვნიშნე იყო ის, რომ გზაგასაყარზე ვიყავი გამეგრძელებინა თუ არა საერთოდ მეღვინეობა და ევროკავშირის, შედეთის და ავსტრიის დახმარებით შევინარჩუნე ჩემი საყვარელი საქმიანობა. უფრო მეტიც, დღეს მე ერთ-ერთი წარმატებული მეღვინეობა მაქვს რეგიონში, რადგან 3500 ბოთლის წარმოებამ საშუალება მომცა უკვე 5 უცხო ქვეყნის ბაზარი მომეპოვებინა.
ასევე, ტრენინგებით მიღებულმა ცოდნამ და გამოფენებზე შეძენილმა გამოცდილებამ ნათლად დამანახა თუ საით უნდა წარვმართო ჩემი ბიზნესი. სწორედ პროექტ GRETA-ს დროულმა დახმარებამ მომაპოვებინა სხვა დამატებითი გრანტი - სოფლის განვითარების სააგენტოსგან, 2022 წელს მივიღე ნახევარ მილიონიანი გრანტი, რომლითაც ავაშენე დიდი მარანი.
ალბათ ჩემის ისტორიის დასასრულს უკვე ნათელია რატომ ვახსენე დასაწყისში სიტყვა „უზარმაზარი“. ეს ყველაფერი არ მოხდებოდა, რომ არა დიდი სურვილი! აი ასე მარტივად ავდექი და დავიწყე. ამიტომ ჩემი გამოცდილებიდან გირჩევთ რომ არ აქვს მნიშვნელობა რა მდგომარეობა გაქვთ, მთავარია დაიწყოთ! და გზად აუცილებლად გამოჩნდება შესაძლებლობები, რომლითაც მიაღწევთ მიზანს.
ახალი მიზნებისა და გამოწვევებისთვის მგამოვხატავ მზაობას და ხელმისაწვდომი ვარ საკონტაქტოდ ელ-ფოსტის საშუალებით: rachuli2015@gmail.com
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განთვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის