სვანეთინიუსი 14.06.2024

„მთავარია დაიწყო და არ გაჩერდე, თუნდაც დასაწყისშივე წაბორძიკდე!“ - გოჩა გულედანი

13.10.2023 02:08

გამარჯობა,

მე გოჩა გულედანი ვარ, საქართველოს ერთ-ერთი ულამაზესი კუთხიდან, ზემო სვანეთიდან,  კერძოდ,  სოფელი ლენჯერიდან. პროფესიით საგზაო ინჟინერი და ამჟამად სასათბურე და ორგანული სოფლის მეურნეობით დაინტერესებული დამწყები მეწარმე. ალბათ გაგიკვირდებათ და იტყვით სასათბურე მეურნეობა და სვანეთი რა კავშირშია ერთმანეთთანო, კი, ცოტა უცნაურად ჟღერს, მაგრამ ფაქტია, რომ დღეს ზემო სვანეთში სასათბურე მეურნეობა წარმატებით ფუნქციონირებს.

ჩემი საქმიანობის წამოწყება რამდენიმე წლის უკან, მესტიაში საინფორმაციო განცხადების ნახვის შემდეგ მოხდა. შევიტყვე, რომ ევროკავშირის, შვედეთის და ავსტრიის ხელშეწყობით, იწყებოდა პროექტი, რომელიც ჩვენს რეგიონსაც მოიცავდა და სამთო ტურიზმის და ორგანული სოფლის მეურნეობის, მათ შორის სასათბურე მეურნეობის საქმიანობის დაფინანსება იგეგმებოდა.

მოგეხსენებათ სვანეთში, როგორც საქართველოს მაღალმთიან რეგიონში, მკაცრი კლიმატური პირობებია, ზაფხული ხანმოკლეა და ძირითადად მოსავალი ვერც კი ასწრებს ბოლომდე დამწიფებას. ამიტომ, ეს ერთი შეხედვით რთული იდეა, საინტერესო გამოწვევად მივიღე და გადავწყვიტე პროექტის დაწერა და პროექტში მონაწილეობის მიღება. შევარჩიე სწორი ადგილი სათბურის მოსაწყობად და დონორები დახმარებით, მალევე დავიწყე სათბურის მშენებლობა.

პირველი ეტაპი სათბურის აშენება და გამართვა იყო, შემდეგ, პროექტის ფარგლებში გადმომეცა ჩითილები, სხვათაშორის პირველ წელს ბულგარული წიწაკით და ბადრიჯნით დავიწყე, მაგრამ სამწუხაროდ არ გაამართლა. იმედგაცრუების შემდეგ,  გულის აიცრუების და ხელის ჩაქნევის შგრძნება მძაფრად გეუფლება. არ დავნებდი, პროექტის დახმარების, კვლავ გავაგრძელე მუშაობა,  თუმცა მეორე წელსაც, ყინვების გამო ვერ მოხდა სასურველი შედეგის მიღება.

წესით აქ უნდა დამთავრებულიყო ჩემი ისტორია, მარცხიანი სტარტიდან გამომდინარე, მაგრამ საბედნიეროდ ეს ასე არ მოხდა. დამეთანხმებით საკმარისი მიზეზი მქონდა დავნებებულიყავი, მაგრამ მგონია რომ მარცხის მიუხედავად ადამიანი არ უნდა გაჩერდეს, ეს მინდა ვურჩიო სხვა დამწყებ მეწარმეებსაც. 

მაინც გადავწყვიტე საქმიანობის გაგრძელება და ამჯერად უკვე მარწყვის კულტურის განვითარებაზე გავაკეთე არჩევანი. ფაქტია, დაფასდა ჩვენი მონდომება, მარწყვმა გაამართლა და ასე მოვედით აქამდე.

დახმარება და კონსულტაციები სხვა ეტაპზე გადავიდა. ევროკავშირის, შვედეთის და ავსტრიის მხარდაჭერით, გავიარე ტრენინგები, რაც აგრო ექსპერტის კონსულტაციასაც გულისხმობდა. ტრენინგებზე მიღებული ცოდნით და პროფესიონალი ექსპერტის დახმარებით, სვანეთში მარწყვის კულტურის განვითარების პროცესი უკვე რეალობად იქცა. მეტსაც გეტყვით, 150 კვადრატულ მეტრზე გაშენებულ სათბურში მოყვანილი მარწყვი, ადგილობრივი ბაზრისთვის, საინტერესო აღმოჩნდა და არსებული მოკრძალებული მოთხოვნა მაგრამ მაინც დაკმაყოფილდა. გარდა ამისა მცირედი შემოსავალიც გაჩნდა და რაც მთავარია,  სვანეთის მზგავს მკაცრ კლიმატურ პირობებში გაჩნდა  მარწყვის მოყვანის შსაძლებლობის პრეცედენტი.

აღნიშნულ სპეროში ჩემი მცირედი გამოცდილებით, შემიძლია ვთქვა, რომ საქართველოში ბიო მიმართულებას დიდი პერსპექტივა აქვს და სხვებსაც ვურჩევ ამ მიმართულებაზე სერიოზულად იფიქრონ, ეს ტურიზმის განვითარებასაც უწყობს ხელს რადგან ტურისტები და არამარტო ტურისტები ადგილობრივ ბიო პრიოდუქტებს უფრო და უფრო დიდ მნიშვნელობას ანიჭებენ. 

რაც შეეხება ჩემს გეგმებს, ჩემმა ისტორიამ ნათლად დამანახა, რომ არ უნდა შემეშინდეს სირთულეების და უკვე მზად ვარ შევხვდე ახალ გამოწვევებს. ვფიქრობ, საქმიანობის გაფართოება გარდაუვალი იქნება, თუ გავითვალისწინებ, რომ მესამე წლისთვის მიზნად დავისახე სრულად ავითვისო 150 კვ.მ-ი ფართობის სათბურის პოტენციალი და ამის შემდეგ ავაშენო დამატებითი სათბურები. ამის გათვალისწინებით მზად ვარ ახალი ბიზნეს პარტნიორობისთვის და დაინტერესებულ პოტენციურ პარტნიორებს შეუძლიათ დამიკავშირდნენ შემდეგი ელექტრონული ფოსტის საშუალებით: gochaguledani1960@gmail.com  იმედი მაქვს, რომ ჩემი ისტორია შთაგონების წყარო გახდება სხვა მეწარმეებისთვისაც.

---

ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.

თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.

 

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს. 


 #68წარმატებისისტორია

#ევროკავშირი #შვედეთი #ავსტრია

#პროექტიGRETA #მთისეკონომიკისგანვითარებისთვის

GE EN RU