გამარჯობა,

მე ბახვა გასვიანი ვარ, მეწარმე  საქართველოს ერთ-ერთი ლამაზი კუთხე ლეჩხუმიდან, კერძოდ ქულბაქიდან, სადაც საკალმახე მეურნეობა მაქვს და გარდა ამისა საქართველოში თევზის ორგანულ საკვებს წარმოების პიონერი ვარ. თუ მწვანე ტბა ჯერ არ გინახავთ, აუცილებლად ამ ზღაპრულ ადგილს, აუცილებლად გირჩევთ ესტუმროთ.

მინდა გიამბოთ, თუ როგორ იქცა ჩემი იდეა რეალურ საქმედ, ევროკავშირის შვედეთის და ავსტრიის ხელშეწყობით. აღნიშნულმა დახმარებამ, ჩემი საქმიანობა საგრძნობლად შეცვალა უკეთესობისკენ და მსურს ორი სიტყვით, საკუთარი გამოცდილება გაგიზიაროთ ამ ძალიან კარგი შესაძლებლობის შესახებ.

ფაქტიურად გუშინდელი დღესავით მახსოვს, 2019 წელი როდესაც ევროკავშირის, შვედეთის და ავსტრიის ხელშეწყობით, პროექტ GRETA-ს ფარგლებში, გამოცხადდა საგრანტო კონკურსი საქართველოს მაღალმთიანი რეგიონების ბიო მეურნეობის საგრანტო კონკურსი გამოცხადდა. ამის შესახებ ადგილობრივი მუნიციპალიტეტისგან შევიტყვე და იმდენად დამაინტერესა, რომ გადავწყვიტე ჩავრთულიყავი. მითუმეტეს პროექტი ჩვენს რეგიონსაც ფარავდა. საინფორმაციო შეხვედრების შემდეგ მიღებული ინსტრუქციების მიხედვით დავწერე პროექტი, სადაც ზედმიწევნით აღვწერე ჩემი ჩანაფიქრი და სამომავლო გეგმები. განსაზღვრული დროის შემდგომ, მივიღე ჩემთვის სასიხარულო წერილი, რომ მოვიპოვე დაფინანსება და გავხდი პროექტის ბენეფიციარი.

დღევანდელ რეალობაში ადგილობრივი საკალმახე მეურნეობისთვის შეიძლება ითქვას, რომ სასიცოცხლოდ მნიშვნელოვანია თევზისთვის საჭირო საკვების ადგილზე წარმოება, რადგან აქამდე, ფაქტიურად ეს სექტორი თევზის საკვების იმპორტზე იყო დამოკიდებული. არ მინდა კრიტიკული ვიყო, თუმცა პირადად ხშირად წავაწყდი იმ წინაღობას, რამაც თევზის საკვების გაფუჭება გამოიწვია. თუნდაც ხანგრძლივი ტრანსპორტირება და შენახვის არასასურველი პირობები საბოლოოდ საკვების არავარგისიანობას განაპირობებდა. დღეს ეს პრობლემა წინაღობას აღარ წარმოადგენს და და მეტიც, უფრო მეტი შესაძლებლობა გაჩნდა, საკუთარი საქმიანობით, არამხოლოდ საკუთარი მოხმარებისთვის ვაწარმოებ, არამედ თევზის ბიო საკვების სხვა მწარმოებლებისთვის მიყიდვასაც   ვახორციელებ. დონორების დახმარებით, შევიძინე თევზის საკვების დასამზადებლად საჭირო ინვენტარი და დღეს ჩემი ბიზნესი მზარდ და რეგიონში პერსპექტიულ ბიზნესად ითვლება.

არ დაგიმალავთ და გეტყვით, რომ დანადგარზე არანაკლებ მნიშვნელოვანი ცოდნაა. ტრენინგების საშუალებით მიღებულმა ცოდნამ, რომელიც დონორების მხარდაჭერით  მთელი ამ პერიოდის განმავლობაში გვიტარდებოდა მეწარმეებს,  ეფექტურობა საგრძნობლად შეგვმატა პრაქტიკაში.

სწორი განვითარების გზაზე ასევე მნიშვნელოვანი იყო ევროკავშირის, შვედეთის და ავსტრიის მხარდაჭერით მარკეტინგული და საბაზრო კავშირების ჩამოყალიბების კუთხით დახმარება. ამჟამად შეფუთვის და დაფასოების მიმართულებაზე ინტენსიურად ვმუშაობ და ნათლად დავინახე მარკეტინგული მიმართულების გაძლიერების აუცილებლობა.

რომ გეკითხათ თუ რა შეცვალა აღნიშნული პროექტის ფარგლებში მიღებულმა დახმარებამ, პირველი რიგში გეტყოდით რომ უმნიშვნელოვანესი პრობლემის მოგვარება მოვახერხე, რამაც ჩემი საქმიანობა უფრო სრულყოფილი, დამოუკიდებელი და მზარდი გახადა. გარდა ამისა დამანახა უფრო ფართო სურათი გრძელვადიან პერსპექტივაში და გამიადვილა ბიზნეს საქმიანობის წარმოება.

დღეის მონაცემით, სიამაყით ჩემიძლია ვთქვა, რომ ჩემი ძირითადი და დამატებითი საქმიანობის მოცულობა, იგივე წარმადობა სამჯერ გაიზარდა. ყველა ციფრზე მნიშვნელოვანი ჩვენთვის არის ის, რომ გაგვიადვილდა საქმე, ეფექტურები გავხდით და უკვე მომავალს წელში გამართულები, იმედიანად ვუყურებთ.

ყველას ჩვენ ჩვენი რთული გზა გვაქვს გასავლელი, ვაგროვებთ გამოცდილებას და შემდეგ ვცდილობთ სხვებსაც გავუზიაროთ, ამიტომაც ვიტყოდი რომ მთავარია მონდომება, თუ არ მოინდომე და არ იყავი მიზანდასახული არაფერი გამოვა.  და კიდევ ერთი მთავარი რამ, ეს არის სწორი ხედვა და საერთო მიზნის ირგვლივ გაერთიანებული გუნდი - ეს ნებისმიერი საქმის წამოწყების წარმატების საწინდარია. ამიტომ, რა დახმარებაც არ უნდა მიიღოს მეწარმემ ეს თუ არ გაითვალისწინა, ჩემი აზრით ეს დამხარება უცებ შეიძლება განიავდეს.

ჩემს გეგმებზეც გეტყვით, მოკრძალებულ გეგმებზე, ვისურვებდი რომ იმდენად გავაფართოვო წარმოება რომ აქ ადგილობრივები დავასაქმო და ჩემი პატარა წვლილი შევიტანო ამ კუთხის განვითარებასა და ეკონომიკურად მოძლიერებაში. ვთვლი, რომ ერთად მეტად ძლიერები ვიქნებით.

ვისაც დააინტერესებს საკალმახე მეურნეობა, გამოცდილების გაზიარება თუ ახალი საქმიანი თანამშრომლობა, ჩვენ სოციალურ სივრცეში სულ ვართ კონტაქტზე - „ქულბაქის მწვანე ტბა“

 

***

ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.

 

თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.

 

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა. გაიგეთ მეტი პროექტ GRETA-ს შესახებ: www.gretaproject.ge

 

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს. 

#68წარმატებისისტორია

#ევროკავშირი #შვედეთი #ავსტრია

#პროექტიGRETA

#მთისეკონომიკისგანვითარებისთვის