გამარჯობა, მე ვარ ზურაბ მაისაშვილი, პროფესიით წარმოების მართვის სპეციალისტი და საკუთარ საქმიანობაზე უზომოდ შეყვარებული მეწარმე. სიამაყით გაცნობებთ, რომ ზღაპრული რაჭის მთებში დაბადებული იშვიათი ჯიშის ყურძნისგან დამზადებულ ბრენდ „ღვინუკას“ ავტორი გახლავართ.

მინდა გაგიზიაროთ ჩემი ისტორია და გითხრათ, რომ ჩვენს ქვეყანაში, ნებისმიერ კუთხეში მცხოვრები მოქალაქისთვის, ევროკავშირის, შვედეთის და ავსტრიის მხარდაჭერით არსებობს საქმიანობის განვითარების ფართო შესაძლებლობები. ამის თქმა თამამად შემიძლია თუნდაც ჩემი პირადი გამოცდილების საფუძველზე.

5 წლის წინ გადავწყვიტე, ჩემი დიდი წინაპრების მიერ წამოწყებული და დროთა განმავლობაში მივიწყებული საქმე - რაჭაში ღვინის წარმოება და იშვიათი ჯიშის ყურძნის ვენახები აღმედგინა. საკმაოდ რთულ საქმეს შევეჭიდე, ბევრი წინაღობა შემხვდა, თუმცა, სადღაც მაინც გულწრფელად მჯეროდა, რომ ეს საქმე გამოვიდოდა. 

შემიძლია ვთქვა, რომ საქმიანობის დასაწყისშივე გამიმართლა და 2019 წელს გამოქვეყნებული ინფორმაცია ვნახე, სადაც დეტალურად იყო ახსნილი, რომ 3 დონორი: ევროკავშირი, შვედეთი და ავსტრია მაღალმთიან რეგიონში, მათ შორის რაჭაში, ორგანული სოფლის მეურნეობის სექტორის განვითარებისთვის, ამ სფეროსთან დაკავშირებულ მცირე და საშუალო ბიზნესებს ხელს უწყობდნენ. ინფორმაციის დეტალურად გაცნობისას, მივხვდი, რომ აუცილებლად უნდა მიმეღო საგრანტო კონკურსში მონაწილეობა და შედეგიც სახეზეა. 

დღეს მაქვს ყველა საჭირო ინვენტარი, უჟანგავი ცისტერნები, გადამამუშავებელი დანადგარები, ღვინის ჩამომსხმელი აპარატები, ფილტრები და ა.შ, რომელმაც 4-ჯერ გაზარდა საწარმოო შესაძლებლობები.

ალბათ დაგაინტერესებთ, კონკრეტულად რაში გამოიხატა წარმოების 4-ჯერ ზრდა... გეტყვით, თუ მანამდე ვაწარმოებდი ერთი სახეობის ღვინოს, ახლა 4 სახეობას ვაწარმოებ და თანაც გაორმაგებული რაოდენობით. გარდა ამისა, დღეს ბრენდი „ღვინუკა“ არ ჩამოუვარდება საერთაშორისო ტენდენციებს და შეიძლება ითქვას, რომ დონორების მხარდაჭერით წელს საქმიანობა მიიღებს ბიო სერტიფიკატს.

გულწრფელად გითხრათ, მეგონა, რომ ჩემი პროფესიული ცოდნა და გამოცდილება მიმდინარე ეტაპზე საკმარისი იყო, მანამ, სანამ მონაწილეობა არ მივიღე ბიო მეღვინეობის ტრენინგებში, რომელიც ასევე დონორების მხარდაჭერით უფასოდ ჩაგვიტარდა. იქ მივხვდი, რომ ჩემი საქმიანობის განვითარების საუკეთესო სტარტი და შესაძლებლობა მქონდა დონორების მხარდაჭერით. ძალიან მიყვარს შედეგის გაზომვა და ამას წინათ ზედმიწევნით გამოვთვალე, რომ მხარდაჭერამდე ჩემი წარმოება 3000 ბოთლს შეადგენდა, რომელიც მანამდე დიდ მოცულობად მეჩვენებოდა, სანამ რეალური შედეგი 15 000 ბოთლამდე არ გაიზარდა.

ამ ყველაფერს რომ ვიხსენებ, სულ მინდა სხვებსაც გავუზიარო, რომ მათაც შეძლონ ამ შესაძლებლობების სწორად გამოყენება და მჯერა, რომ მონდომებით, მიზანდასახულობით და ძალისხმევით აუცილებლად გამოვა ჩანაფიქრი თუ უკვე დაწყებული საქმე.

დღევანდელი გადმოსახედიდან მე უკვე ვხედავ ჩემს ბიზნეს საქმიანობას, რომელსაც უკვე ბიო სერტიფიკატი აქვს მინიჭებული და სწორებას, ახლა უკვე პრემიუმ ხარისხზე თამამად აკეთებს.

სურვილი მაქვს, რომ სხვებმაც, ვისაც საქმიანობის გზაზე იწვნიეს მარცხი, წინააღმდეგობების შედეგად გაუჩნდათ დანებების სურვილიც კი, არ შეშინდნენ, აუცილებლად მაინც უნდა განაგრძონ წინსვლა და ახალი შესაძლებლობების აღმოჩენა.

ვისაც დააინტერესებს მეღვინეობა „ღვინუკა“ და სხვა მნიშვნელოვანი საკითხები, მიღებული გამოცდილება თუ საქმიანი თანამშრომლობა, ჩვენ სოციალურ სივრცეში სულ ვართ კონტაქტზე - ღვინუკა • Gvinuka

***

ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განთვითარებისთვის, ჯამში 68 მეწარმეს ითვლის. 

თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს. 

#68წარმატებისისტორია 

#ევროკავშირი #შვედეთი #ავსტრია 

#პროექტიGRETA

#მთისეკონომიკისგანვითარებისთვის