Ამა წლის 13 ოქტომბერს Მესტიას "ქართულ-გერმანული რეპროდუქციული ცენტრის" ექიმები-კლინიკის რეპროდუქტოლოგი, უროლოგი, რადიოლოგი და ონკოქირურგი ესტუმრნენ, რომლებმაც მოსახლეობისთვის, კარძოდ კი უშვილო წყვილებისთვის რეპროდუქციული კვლევები ჩაატარეს.
როგორც "ქართულ-გერმანული რეპროდუქციული ცენტრის" კლინიკური დირექტორი ნინო მუსერიძე ამბობს, უშვილობის მიზეზის კვლევას დიდი თანხები სჭირდება, რომელიც არ ფინანსდება, ამიტომ შეიქმნა ფონდი "შენთვის" და სწორედ ამ ფონდის დახმარებით ისინი დადიან რეგიონებში და მათთან მისულ უშვილო წყვილებს უფასო გამოკვლევებს უტარებენ.
"საქართველოში უშვილობის პრობლემა განსხვავდება მსოფლიოს სხვა ქვეყნების იგივე პრობლემისგან. მიუხედავად იმისა, რომ დღეს საქართველოში უნაყოფობის მკურნალობის ყველა იმ მეთოდს ვფლობთ და ვახორციელებთ წარმატებით, რასაც მსოფლიოს სხვა ქვეყნებში მიმართავენ, სამწუხაროდ, ძალიან ცოტა ოჯახი ახერხებს მიმართოს რეპროდუქტოლოგს და მიიღოს რეპროდუქციული სერვისი. მიზეზი ძვირადღირებული პროცედურებია, და თუ სხვა ქვეყნებში უშვილობას სახელმწიფოც და კერძო სექტორიც თითქმის სრულად აფინანსებს, ჩვენთან ასე არაა, არც ერთი ინსტიტუცია უშვილობას არ აფინანსებს, როგორც აღმოჩნდა., სწორედ ესაა დღეისათვის ჩვენთან უშვილო წყვილების მთავარი პრობლემა და არა მისი გადაჭრის სამედიცინო გზები. სწორედ ამ ბარიერის დასაძლევად შეიქმნა ფონდი „შენთვის“, როგორც ქართულ-გერმანული რეპროდუქციული ცენტრის სოციალური პასუხისმგებლობა და უშვილო წყვილების მხარდაჭერის პროექტის ფარგლებში კლინიკის მედიკოსთა გუნდი სისტემატიურად ატარებს მთელი საქართველოს მასშტაბით უფასო კვლევების და კონსულტაციების აქციებს"-ამბობს მუსერიძე.
Მისივე თქმით რეგიონებში აქციები ხშირია.
„ზუგდიდში თითქმის ყოველთვიურად გვაქვს მსგავსი აქცია ადგილობრივი მოსახლეობის თხოვნით და ყოველ ჯერზე ასამდე პაციენტს ვუტარებთ კვლევებს და კონსულტაციას, ყოველ შემდეგ ვიზიტზე უკვე დაბადებული ბავშვებით გვსტუმრობენ ადგილობრივი პაციენტები, ესაა ის მთავარი მიღწევა და შედეგი, რასკენაც ჩვენ მივისწრაფით, მეტი ახალი სიცოცხლე და ერის გენოფონდის გადარჩენა, საქართველო ურთულეს დემოგრაფიულ ვითარებაშია ბოლო დროს და ეს ჩვენი დადებული ერთი აგურია ამ მიმართულებით. სვანეთში პირველად ამოვედით, იმედი გვაქვს აქაც ისეთივე შედეგები გვექნება, როგორც აჭარის, სამეგრელოს, კახეთის რეგიონებში.
Ამავე პროექტის ფარგლებში მესტიის ამბულატორიაში კლინიკის და სოფლების ოჯახის ექიმებისთვის ჩატარდა სემინარი თემაზე: „რეპროდუქციული მედიცინა დღეს, რას სთავაზობს ოჯახის ექიმი უშვილო წყვილს და რა შედეგის მიღწევა შეუძლია რეპროდუქტოლოგს“. ოჯახის ექიმთა კითხვებს კლინიკის სპეციალისტები პასუხობდნენ, განსაკუთრებული ინტერესი გამოიწვია ადგილობრივი კოლეგების მხრიდან სიახლეებმა რეპროდუქციულ მედიცინაში, "რას სთავაზობს სტუმარი კლინიკა დღეს უშვილო წყვილებს" და ფონდის თანადაფინანსების პროგრამამ.
როგორც სემინარის მონაწილე, ოჯახის ექიმი თეა ცინდელიანი ამბობს, ისეთი მაღალმთიანი რეგიონისთვის, როგორიც მესტიაა, მსგავსი ვიზიტიები აუცილებელია.
"უპირველეს ყოვლისა მინდა დიდი მადლობა გადაუხადო ექიმებს სვანეთში ვიზიტისთვის, უაღრესად საინტერესო და ინფორმაციულად დატვირთული შეხვედრა გვქონდა რეპროდუქციულ მედიცინაში არსებულ სიახლეებსა და გამოწვევებზე. ცხადია ეს საკითხი მესტიის მუნიციპალიტეტშიც ისეთივე აქტუალური და მნიშვნელოვანია, როგორც სხვა რეგიონებში. ჩვენთან ამ მიმართულებით კონსულტაცია და პროცედურები არ არის ხელმისაწვდომი,ამიტომ ძალიან მნიშვნელოვანი და დროული იყო აღნიშნილი პრფილის ექიმთა ვიზიტი"- ამბობს თეა ცინდელიანი.
ქართულ-გერმანული რეპროდუქციული ცენტრის კლინიკური დირექტორის თქმით მსგავსი აქციები და სემინარები მესტიაში საზოგადოების მოთხოვნიდან გამომდინარე- მომავალშიც ჩატარდება.
© სვანეთინიუსი