სვანეთის მოსახლეობას, რომელიც დენის ტარიფის გადახდისგან გათავისუფლებულია, შესაძლოა ელექტროენერგიის საფასურის გადახდა მოუწიოს. ამის შესახებ ეკონომიკისა და მდგრადი განვითარების მინისტრმა რამდენიმე დღის წინ განაცხადა.
“საქართველოს მთელი მოსახლეობა ვალდებულია, რომ პირნათლად გადაიხადოს ელექტროენერგიის საფასური. ჩვენ კომპანია “ენერგო – პრო ჯორჯიას” ვეხმარებით, რომ ამ თვალსაზრისით დისციპლინა გაიზარდოს. რა თქმა უნდა, ვითვალისწინებთ გარკვეულ სპეციფიკას, მაგრამ საბოლოო ჯამში, ყველამ უნდა გადაიხადოს ელექტროენერგიის საფასური” – განაცხადა ნათია თურნავამ კითხვის საპასუხოდ, მოუწევს თუ არა სვანეთის მოსახლეობას ელექტროენერგიის საფასურის გადახდა.
მინისტრი სვანეთში ბიტკოინების არალეგალურ წარმოების თემასაც შეეხო და აღნიშნა, რომ სვანეთის ტერიტორიაზე აღურიცხავი მოხმარება გაიზარდა და არსებობს ეჭვი, რომ არალეგალური მაინინგი ხორციელდება.
თავის მხრივ, „ენერგო–პრო ჯორჯიას“ გენერალური დირექტორი აცხადებს, რომ მესტიის რაიონის ელექტროენერგიის მოხმარება თითქმის გასამმაგებულია და კრიტიკულ ზღვარს გადააჭარბა.
„2019 წლის დეკემბერში მესტიის რაიონმა იმდენივე ელექტროენერგია მოიხმარა, რაც იმავე პერიოდში, ერთად აღებულმა, 19 რაიონის საყოფაცხოვრებო მომხმარებლებმა. მოხმარების დრამატული ზრდის  მიზეზი კრიპტოვალუტის მწარმოებელი, საშუალო თუ მცირე, ფერმების მესტიაში გადატანაა. ელექტროენერგიის ესოდენ გაზრდილი მოხმარება მნიშვნელოვან საფრთხეს უქმნის ქსელის მდგომარეობას და მომხმარებელთა უსაფრთხოებას – განაცხადა მიხეილ ბოცვაძემ.
„ელექტროენერგიის დამტაცებლებისა და კრიმინალების გამო კეთილსინდისიერი მომხმარებლები არ უნდა ზარალდებოდნენ. ეს სვანეთის მოსახლეობისგან დაცლას გამოიწვევს“ – ეკონომიკის მეცნიერებათა დოქტორი, ინჟინერ–გეოლოგი, საქართველოს საინჟინრო აკადემიის წევრ–კორესპოდენტი, პუბლიცისტი ვაჟა კაკაბაძე სვანეთისთვის მოსახლეობისთვის დაწესებული შეღავათების გაუქმების მოსალოდნელ შედეგებზე საუბრობს.

_ სვანეთში არ იხდიან ელექტროენერგიის გადასახადს იქიდან გამომდინარე, რომ სახელმწიფომ გადაწყვიტა ამით ტყეზე ზეწოლა შეემცირებინა და გათბობისთვის ტყის გამოყენება არ მომხდარიყო. შესაბამისად, ამ დრომდე, ზემო სვანეთის მოსახლეობა ელექტროენერგიის გადასახადს არ იხდიდა, ხოლო ქვეყნის სხვა მაღალმთიან დასახლებებში სამომხმარებლო ტარიფის 50%-იანი სუბსიდირება მოქმედებს. ამდენად, ჩემთვის სრულიად გაუგებარია ეკონომიკისა და მდგრადი განვითარების მინისტრის ნათია თურნავას განცხადება, რომ ამიერიდან, ზემო სვანეთის მოსახლეობამ ელექტრო ენერგიის მოხმარების ტარიფი უნდა გადაიხადოს.  გამოდის, რომ მოწოდებები „შევინარჩუნოთ მთაში მოსახლეობა“ და „განვავითაროთ   საქართველოს მაღალმთიან რეგიონებში ტურიზმი“ მხოლოდ ლიტონი სიტყვებია და სხვა არაფერი? იმდენს იზამენ, რომ სვანეთს სვანები დატოვებენ, უცხოელები დაეპატრონებიან და სვანების ნამოსახლარზე ტურისტულ ზონას შექმნიან.
_  ეკონომიკის მინისტრის თქმით, სვანეთის ტერიტორიაზე გაიზარდა ელექტროენერგიის აღურიცხავი მოხმარება. ეჭვია ბიტკოინების არალეგალურ წარმოებაზეც.
_ მართალია, დაფიქსირდა არალეგალური მაინინგი (ეს არის დისტანციური გამოყენება გამოთვლითი სიმძლავრეების კრიპტოვალუტის მოსაპოვებლად ), მაგრამ ამ მიმართულებით გარკვეული ღონისძიებები გატარდა, მათ შორის „ენერგო – პრო ჯორჯიას” მხრიდან და პრობლემა ამოიფხვრა. ამდენად, რაიმე სადამსჯელო ღონისძიებების გატარება, თუნდაც აფხაზეთის მოსახლეობის სასარგებლოდ, გაუმართლებელია როგორც ეკონომიკური, ასევე პოლიტიკური თვალსაზრისით. ზოგადად, ელექტროენეწრგიის დატაცება დანაშაულია და დანაშაულს სხვა სტრუქტურა და სხვა მეთოდებით ებრძვის. ელექტროენერგიის დამტაცებლებისა და კრიმინალების გამო კეთილსინდისიერი მომხმარებლები არ უნდა ზარალდებოდნენ. ეს სვანეთის მოსახლეობისგან დაცლას გამოიწვევს.
თავის დროზე, მთიანი მხარის დაცლის მიზნით, იგივე გააკეთა კახა ბენდუქიძემ, როცა გააუქმა წინა მთავრობის გადაწყვეტილება ყაზბეგის მოსახლეობისათვის გაზის უფასოდ მიწოდების შესახებ და მხოლოდ შეღავათები დააწესა. არადა, სწორედ იმ გადაწყვეტილების წყალობით ხალხი სოფლებში დაბრუნდა, სათბურები ააშენა და ეკონომიკურად წელში გაიმართა. დავუბრუნდები ისევ ზემო სვანეთის საკითხს. ეს რა უბედურება, აფხაზებს 40% ელექტროენერგიას უფასოდ ვაძლევთ, ხოლო სვანებს ვავიწროვებთ.. ეს არის მთიანი მხარის განვითარების პროგრამა? ნუთუ სხვა გამოსავალი ვერ ნახეს?

© „პროგრესნიუსი“