სვანეთინიუსი 16.06.2019

მესტიაში "ევროპის დღეები 2019" აღინიშნა

23.05.2019 20:50

მესტიაში "ევროპის დღეები 2019" ჩვეული ხალისითა და დიდი ზეიმით აღინიშნა.

ღონისძიების ფარგლებში, მესტიის მუნიციპალიტეტის მერიის შენობის მიმდებარე ტერიტორიაზე მოეწყო "სამეგრელო-ზემო სვანეთის რეგიონის მეწარმეებისა  და კოოპერატივების" პროდუქციის გამოფენა-გაყიდვა და "ევროპის დღისადმი" მიძღვნილი მესტიის მუნიციპალიტეტის სკოლების მოსწავლეების ნახატებისა და პოსტერების გამოფენა.

ნატოსა და ევროკავშირის შესახებ საინფორმაციო ცენტრის მიერ მოეწყო საინფორმაციო კუთხე, სადაც დამთვალიერებელს საშუალება ჰქონდა გაცნობოდა საქართველოსა და ევროკავშირის ურთიერთობების, ევროკავშირის შესახებ გავრცელებული მითებისა და რეალობის შესახებ ინფორმაციას.

ჩატარდა შეჯიბრი სირბილში და გათამაშდა „ევროპის დღეების თასი“.

ღონისძიება მუსიკალურად ადგილობრივმა შემსრულებლებმა გააფორმეს.

„ევროპის დღე-2019-ს" ადგილობრივ მოსახლეობასთან და უცხოელ ტურისტებთან ერთად სამეგრელო-ზემო სვანეთის გუბერნატორის მოადგილე ქალბატონი ნინო ვიბლიანი და საინფორმაციო ცენტრი ნატოსა და ევროკავშირის შესახებ წარმომადგენელი სამეგრელო-ზემო სვანეთის ბიუროში  ანა ცანავა ესწრებოდნენ.

მესტიას ასევე სტუმრობდნენ ევროკავშირის სადამკვირვებლო მისიის წარმომადგენლებიც, რომლებმაც ასევე საინფორმაციო კუთხე მოაწყვეს.

ღონისძიების დასასრულს გარბენის გამარჯვებულები გარდამავალი თასებით, მედლებითა და სიგელებით დაჯილდოვდნენ, ხოლო  ნახატების კონკურსში გამარჯვებულებს სიგელები გადაეცათ.

შეგახსენებთ, რომ ღონისძიება გაიმართა საგარეო საქმეთა სამინისტროს "სსიპ-ის ნატოსა და ევროკავშირის შესახებ საინფორმაციო ცენტრის" სამეგრელო-ზემო სვანეთის ბიუროს ორგანიზებითა და მესტიის მუნიციპალიტეტის მერიის მხარდაჭერით.

ევროპის დღეების მიზანია ევროკავშირისა და საქართველოს ურთიერთობების, მიმდინარე ინტეგრაციის პროცესის შესახებ საქართველოს მოქალაქეების ინფორმირება და სხვადასხვა სამიზნე ჯგუფების ჩართულობის გაზრდა.

GE EN RU