ლენტეხი-მესტიის დამაკავშირებელი  საავტომობილო გზისა და 9 კმ-იანი გვირაბის  მშენებლობის პროექტირება განახლდა. ამ ინფორმაციას საავტომობილო გზების დეპარტამენტი ავრცელებს.

"მიუხედავად პროექტირების მიმდინარეობისას არსებული შეფერხებებისა,  ლენტეხი-მესტიის ახალი გზის განვითარება გრძელდება. საავტომობილო გზების დეპარტამენტის აქტიური ჩართულობით განახლებულმა საპროექტო გუნდმა მოახერხა გზის სიგრძის 80%-ის დაზუსტება. ამ ეტაპზე, მიმდინარეობს რთული რელიეფური და ჰიდროგეოლოგიური მონაცემების დაზუსტება-დამუშავება. ასევე, აქტიურად მიმდინარეობს მთელ მარშრუტზე ხელოვნური ნაგებობების დაპროექტება"-ნათქვამია განცხადებაში.

მათივე თქმით ლენტეხი-მესტიის დამაკავშირებელი გზის სავარაუდო სიგრძე 27 კმ-ია, ასევე დაგეგმილია 9 კმ-იანი გვირაბის მშენებლობა. გზის სიგანე 8 მეტრი იქნება, საიდანაც 6.5 მეტრი ასფალტ-ბეტონის საფარისთვისაა განკუთვნილი, დანარჩენი კი გვერდულებისთვის.

შეგახსენებთ, რომ ლენტეხისა და მესტიის დამაკავშირებელი გზა, ლენტეხიდან დაიწყება, გაივლის ლასკადულას ხეობას, მთიან მასივს 9 კმ-იანი გვირაბით და ლაილაჭის ხეობის გავლით შეუერთდება ზუგდიდი-მესტიის გზას, ლეშგუანის დასახლებასთან. ამ გზით, ზემო და ქვემო სვანეთი უმოკლესი გზით დაუკავშირდება ერთმანეთს. პროექტის დასრულების შემდეგ კი ლენტეხი-მესტიის მიმართულებით გადაადგილების დრო დაახლოებით 1.5 საათით შემცირდება.

გზა გაივლის 36 სოფელს, მათ შორის, საყდარს, მარგვიშსისა და ლაშხეთის სოფლებს. ამ მონაკვეთის მშენებლობა იძლევა საშუალებას ცაგერი-ლენტეხის გავლით, უმოკლესი გზით მოხვდეთ მესტიაში.