დღეიდან  2 მარტის ჩათვლით, მესტიის მუნიციპალიტეტი 41-ე საერთაშორისო  შეჯიბრ-სემინარს მასპინძლობს, რომელიც საქართველოს არქიტექტორთა კავშირისა და ამავე კავშირთან არსებული მოთხილამურე არქიტექტორთა საერთაშორისო კლუბ „SKIA“-ს ორგანიზებით ტარდება. სპორტული შეჯიბრი სამთო-სათხილამურო კურორტ თეთნულდზე იმართება.

შეჯიბრებების  ფარგლებში მოეწყობა, არქიტექტურული კონკურსი და სემინარ-ვორქშოპები. შეჯიბრებებში მონაწილეობას კი მიიღებენ სხვადასხვა ქვეყნიდან მოწვეული  უცხოელი არქიტექტორები.

არქიტექტურული კონკურსი შემდეგი თემატიკის მიხედვით გაიმართება:

1. ინდივიდუალური საცხოვრებელი კოტეჯი მთიან რეგიონში;

2. ოჯახური ტიპის სასტუმრო სახლი მთიან რეგიონში;

3. სათემო საზოგადოებრივი ცენტრი მთიან რეგიონში;

საპროექტო ტერიტორია, რომელზედაც უნდა განთავსდეს საკონკურსო შენობა არის ზოგადი, მაგრამ პროექტი აუცილებელად გათვლილი უნდა იყოს სვანეთის უნიკალური და მკაცრი პირობებისათვის, უნდა ითვალისწინებდეს მრავალსაუკუნოვან მდიდარ არქიტექტურულ მემკვიდრეობას, რომლის წარმოჩენასაც კონკურსში მონაწილეებმა განსაკუთრებული ყურადღება უნდა დაუთმონ.  

შეჯიბრის ტექნიკურ და ფინანსურ მხარდაჭერას მესტიის მუნიციპალიტეტის მერია უზრუნველყოფს. 

შეგახსენებთ, რომ სამთო მოთხილამურე არქიტექტორთა კლუბი „SKIA“ დაარსდა 1977 წელს, წლების განმავლობაში, ზამთრის პერიოდში სისტემატიურად ტარდება ყოველწლიური შეჯიბრი-სემინარები საქართველოს სხვადასხვა რეგიონებში. მესტიის მუნიციპალიტეტში მსგავსი ღონისძიება პირველად ტარდება.