სვანეთინიუსი 18.01.2019

თეთნულდის სათხილამურო კურორტი (ინფორმაცია დამსვენებლებისთვის)

14.12.2018 16:36

სამთო-სათხილამურო კურორტი თეთნულდი მდებარეობს ზემო სვანეთში, მესტიის მუნიციპალიტეტში- კავკასიონის მთავარ წყალგამყოფ ქედზე.  სათხილამურო ტრასის მაქსიმალური სიმაღლე ზღვის დონიდან 3160 მეტრია, ხოლო მინიმალური 2260 მეტრი. კურორტი მესტიიდან 15 კილომეტრშია, ტრანსპორტირების საშუალო დრო 1 საათი.

როგორ მოვხვდეთ კურორტ თეთნულდზე:

კურორტზე მოსახვედრად პირველ რიგში საჭიროა მესტიაში ჩასვლა. მესტიაში ჩასვლა შესაძლებელია, როგორც საკუთარი ავტომობილით ისე სამარშრუტო ტაქსით, ასევე სრულდება ავიარეისები მესტია-ნატახტარი-მესტია და მესტია-ქუთაისი-მესტიის მიმართულებით.ავიარეისებს ახორციელებს ქართული კომპანია Vanilla Sky, თუმცა ბილეთები შირ შემთხვევაში წინასწარ დაჯავშნილია.

მესტიიდან კურორტ თეთნულდამდე, ზამთრის სეზონზე საჭიროა მაღალი გამავლობის ავტომობილი ან შეგიძლიათ მარტივად დაიქირაოთ ტაქსი მესტიის ცენტრში.

მესტიიდან კურორტ თეთნულდამდე 1 საათის სავალი გზაა.

სასრიალო ტრასები:

თეთნულდის სათხილამურო ტრასა, ამიერკავკასიაში ყველაზე გრძელი - 9,5 კმ. და ყველაზე დიდი ვერტიკალური ვარდნის მქონეა - 1,7 კმ. საათი. საერთო სიგრძე ჯამში 30 კილომეტრია.

კურორტ თეთნულდზე, ამ ეტაპზე დამონტაჟებულია 4 საბაგირო, ორი ღია და ორი ბაბლის ტიპის (წარმოებული კომპანია „პომა“-ს მიერ) ეტაპობრივად იგეგმება განვითარება და ახალი საბაგიროების მოწყობა - მონტაჟი.

ინფრასტრუქტურა:

სათხილამურო კურორტ თეთნულდის მშენებლობა დაიწყო 2014 წელს, პირველი ეტაპი დასრულდა 2016 წელს და ამ დრომდე ეტაპობრივად მიმდინარეობს მისი განვითარება. ამჯამად კურორტზე ფუნქციონირებს რესტორანი თეთნულდი და რამდენიმე სწრაფი კვების ობიექტი. კურორტზე შესაძლებელია სათხილამურო აღჭურვილობის ქირაობაც. ასევე მოწყობილია უფასო ავტოსადგომი. 

კურორტის სეზონურობა:

კურორტზე სათხილამურო სეზონი დეკემბრიდან აპრილამდე გრძელდება, თუმცა საუკეთესო პერიოდი იანვარი - თებერვალია. თეთნულდი გამოირჩევა ერთ-ერთი ყველაზე ხანგრძლივი სათხილამურო სეზონით.

თეთნულდი დამსვენებლებს სთავაზობს სხვადასხვა აქტივობებს: თხილამურებით სრიალი, სნოუბორდი, თავისუფალი სრიალი (Freeride), სკიტური, ჰელისკი,  პარაპლანით ფრენა, საცხენოსნო ტურები და სხვა.

სათხილამურო კურორტ თეთნულდის სავიზიტო ბარათია - "მუდმივად ახალი, დიდი და ხარიახანი თოვლი, გაუკვალავ თოვლში სრიალის მოყვარულთათვის". ასევე მისი მდებარეობა, ხედები დიდებულ მწვერვალებზე - მწვერვალი უშბა და მწვერვალი  თეთნულდი. მრავალფეროვანი გარემო სხვა და სხვა სტილის სრიალის მოყვარულთათვის და უბრალოდ ბევრი თავგადასავალი.

კურორტი თეთნულდი 15 კმ.ით არის დაშორებული მესტიიდან და თუ საკუთარი ავტომობილი არ გყავთ ძვირი დაგიჯდებათ ყოველდღიურად ტაქსით გადაადგილება.

კურორტის დადებითი მხარეა  თოვლის ხარისხი და გაუკვალავ თოვლში სრიალისთვის მდიდარი გარემო. აქ შეგიძლიათ ისრიალოთ როგორც ტყეში, ისე თეთნულდის უკიდურესად დახრილ კალთებზე. კურორტზე საკმაოდ ხშირად თოვს, რაც იდეალურ გარემოს ქმნის ნებისმიერი დონის მოთხილამურისათვის. თუმცა უნდა გაითვალისწინოთ, რომ თეთნულდის ფერდობები საკმაოდ ზვავსაშიშია და სახიფათო ზონებში სრიალის დროს აუცილებლად დაგჭირდებათ უსაფრთხოებისთვის შესაბამისი აღჭურვილობა.

GE EN RU