სვანეთინიუსი 29.11.2021

საგზაო დეპარტამენტის უფროსის განცხადებით ბეჩოში გზის დაგების სამუშაოები ნოემბრის ბოლომდე დასრულდება

17.10.2018 17:51

დღეს ბეჩოს თემის მიმდებარე ტერიტორიაზე 4 კილომეტრამდე გზის  დაუსრულებელ სამუშაოებს მოსახლეობის განახლებული  პროტესტი მოჰყვა. ადგილობრივებმა აქცია გამართეს და ცენტრალური გზა გადაკეტეს. ისინი საგზაო დეპარტამენტისგან  საგზაო სამუშაოების შეჩერების მიზეზის ახსნასა და ბეჩოს თემში სოფლებთან დამაკავშირებელი დარჩენილი 3 კმ და 700მ სიგრძის გზის მონაკვეთზე სამუშაოების დასრულებას მოითხოვდნენ.

მესტიის მუნიციპალიტეტის მერის წარმომადგენელის ბეჩოში, სიმონა არღვლიანის განცხადებით გზების დეპარტამენტის თავმჯდომარე ირაკლი ქარსელაძე ცრუობს, როცა ამბობს, რომ კონტრაქტორი კომპანია ერთი კვირაა აქტიურად მუშაობს, ბეჩოში და ტექნიკა მობილიზებულია.

"არანაირი სამუშაოები არ განახლებულა, თითიც არაფერზე დაუდიათ და რატომ ცრუობს ან ვის ატყუებს ირაკლი ქარსელაძე -ჩემთვის გაუგებარია! გზების დაგების სამუშაოები რომ მიმდინარეობდეს, 1 კვირა კი არა თუნდაც გუშინ დაეწყოთ დღეს ჩვენ აქციას რატომ გავმართავდით?!"-ამბობს სიმონ არღვლიანი.

გზების დეპარტამენტის უფროსის, ირაკლი ქარსელაძის განცხადებით კი კონტრაქტორი კომპანია ვალდებულების შეუსრულებლობის გამო 28 000 ლარით დაჯარიმდა.

„სარეაბილიტაციო სამუშაოების ვადები კონტრაქტორი ორგანიზაციების მხრიდან ვალდებულებების შეუსრულებლობის გამო რამდენჯერმე შეიცვალა, თუმცა ამ ეტაპზე პრობლემა მოგვარებულია. წინა კვირას შევთანხმდით კონტრაქტორთნ, რომელმაც აიღო ვალდებულება, რომ ნოემბრის ბოლომდე მორჩება ამ პროექტს.ტექნიკა ადგილზეა და იწყება ასფალტის დაგება. ნოემბრის ბოლოს ბეჩოს მოსახლეობას რეალურად ექნება დასრულებული, ასფალტირებული გზა“,- განაცხადა ქარსელაძემ.

გზების დეპარტამენტის თავმჯდომარემ მოსახლეობას მოუწოდა სამუშაოებს ხელი არ შეუშალონ. ამ მოწოდებას კი ბეჩოს გამგებელი სიმონ არღვლიანი პასუხობს.

-ირაკლი ქარსელაძეს ურჩევნია არაადეკვატური განცხადებების გაკეთებას და სიცრუის აფიშირებას- მიხედოს თავის საქმეს. გზების დაგების სამუშაოებს რატომ უნდა შევუშალოთ ხელი, გიჟები ვართ?! ან რომ ამბობს ტექნიკა ადგილზეაო, სად არის მისი მობილიზებული ტექნიკა-ან დაწყებული სამუშაოები, დაგვანახოს! თუ ჩვენ დავბრმავდით ყველა და თვითონ ხედავს მარტო? იცვლებიან. და ჯარიმდებიან კომპანიები, გზა კი ისევ დანგრეულია და ამ გზებზე წვალება უწევს მასწავლებელსაც, მოსწავლესაც, მოხუცსაც და ახალგაზრდასაც-ყველას!.. ქარსელაძეს ვურჩევ მოეშვას ტყუილებით თავის მართლებას, პატივი სცეს თავის პარტიულ კოლეგებს და დაასრულოს დაწყებული საქმე"- განაცხადა ბეჩოს გამგებელმა სიმონ არღვლიანმა.

შეგახსენებთ, რომ ბეჩოს ტერიტორიულ ერთეულში გზის დაგებას საგზაო დეპარტამენტი-ცენტრალური ბიუჯეტის დაფინანსებით ახორციელებს.

GE EN RU