ბეჩოს თემის მიმდებარე ტერიტორიაზე 4 კილომეტრამდე გზის  დღემდე დაუსრულებელ სამუშაოებს მოსახლეობის პროტესტი მოჰყვა. 30-მდე ადამიანი  საგზაო დეპარტამენტისგან საგზაო სამუშაოების შეწყვეტის მიზეზის ახსნასა და გზის დროულად დაგებას მოითხოვდა. (შეგახაენებთ, რომ ბეჩოს თემში სულ 500-მდე ადამიანი ცხოვრობს)

მათთან მოსალაპარაკებლად მესტიის მუნიციპალიტეტის მერი, კახა ჟორჟოლიანი მივიდა. მესტიის მუნიციპალიტეტის მერი ადგილობრივებს დაპირდა, რომ თუ ახალი კომპანია 10 ოქტომბრიდან ბეჩოს თემში  გზის დაგების სამუშაოებს არ გააგრძელებს, პროტესტს ხალხთან ერათად შეუერთდება.

დღემდე დაუგებელი გზის გამო უკმაყოფილებას გამოხატავს ასევე მესტიის მუნიციპალიტეტის წარმომადგენელი ბეჩოს თემში სიმონ არღვლიანი. მისი თქმით  6 წლის წინ დაწყებული გზის სარეაბილიტაციო სამუშაოები ჯერ კიდევ არ დასრულებულა. ამ ხნის განმავლობაში კი უკვე მეოთხე კომპანია გამოიცვალა, რომელმაც ნაკისრი ვალდებულებები არ შეასრულა.

"მოსახლეობა ითხოვს სროულად დაიგოს ბეჩოს თემში სოფლებთან დამაკავშირებელი დარჩენილი 3 კმ და 700მ სიგრძის გზა. აქ სამუშაოები ამჟამად მეოთხე კომპანიას უნდა განეხორციელებინა და ახლა აქტიურ რეჟიმში უნდა მუშაობდნენ, მაგრამ როგორც აღმოჩნდა ეს კომპანიაც ვერ ასრულებს ნაკისრ ვალდებულებებს. რატომ გაიწელა დროში ამ მცირე მონაკვეთზე გზის დაგება-ჩემთვის უცნობია. ახლა როგორც ვიცი კვლავ გამოცხადებულია ტენდერი და ველოდებით მეხუთე კომპანიას, რომელიც 10 ოქტომბრიდან აიღებს ვალდებულებას საკუთარ თავზე, რომ გზა სრულად და ხარისხიანად დაიგოს"-განაცხადა სიმონ არღვლიანმა.

შეგახსენებთ, რომ ბეჩოს ტერიტორიულ ერთეულში გზის დაგებას საგზაო დეპარტამენტი-ცენტრალური ბიუჯეტის დაფინანსებით ახორციელებს.