სვანეთინიუსი 22.08.2019

ხვალ ძიუდოს მსოფლიო ჩემპიონატზე უშანგი მარგიანი 90 კგ.წონით კატეგორიაში იასპარეზებს

23.09.2018 22:51

ძიუდოში აზერბაიჯანის დედაქალაქ ბაქოში მსოფლიო ჩემპიონატი მიმდინარეობს.  ქართველმა ძიუდოისტებმა ჯერ მხოლოდ ერთი მედლის (60კგ წონით კატეგორიაში ამირან პაპინაშვილმა ბრინჯაოს მედალი დაიმსახურა) მოპოვება შეძლეს. ხვალ 90კგ წონით კატეგორიაში ორი ძალიან ძლიერი ქართველი იჭიდავებს და უდიდესი შანსია, საქართველომ მინიმუმ ერთი მედალი მოიპოვოს.

90 კგ წონით კატეგორიაში საქართველოს ორი ძიუდოისტი წარადგენს. მიუხედავად იმისა, რომ ბექა ღვინიაშვილს მსოფლიოსა და ევროპის ჩემპიონატებზე ჯერ სერიოზული შედეგებისთვის არ მიუღწევია, იგი მაინც მსოფლიო ჩემპიონობის ერთ-ერთ მთავარ კანდიდატად განიხილება. მისი ნიჭი ნამდვილად იძლევა იმის საშუალებას, რომ ამ წონაში საუკეთესო ძიუდოისტი იყოს. მიმდინარე სეზონში ღვინიაშვილი პარიზის გრანსლემის ფინალში გავიდა, თუმცა მსოფლიო ჩემპიონატზე წასვლა ბოლომდე მაინც არ ჰქონდა განაღდებული. ბაქოში წასვლის უფლება ბექამ ბრატისლავაში გამართულ ევროპის თასზე მოიპოვა, სადაც ფინალში ავთანდილ ჭრიკიშვილი დაამარცხა. პირველ რაუნდში ღვინიაშვილი გერმანელ ედუარდ ტრიპელს დაუპირისპირდება.

რაც შეეხება მარგიანს, იგი შარშანდელი მსოფლიო ჩემპიონატის ბრინჯაოს პრიზიორია. ამის შემდეგ მან ტოკიოს გრანდ სლემზეც მოახერხა ბრინჯაოს მოპოვება, რამაც მწვრთნელებს მისი მსოფლიო ჩემპიონატზე წაყვანა საბოლოოდ გადააწყვეტინა. ამ სეზონში მარგიანის ანგარიშზე ბუდაპეშტის გრანპრიზე მოპოვებული ვერცხლის მედალიცაა. უშანგი პირველ რაუნდში ისვენებს და მედლისთვის ბრძოლაში მეორე რაუნდიდან ჩაერთვება.

კონკურენტები:

დონგან გვაკი, კენტა ნაგასავა

ქართველების მთავარ კონკურენტებად იაპონელი და კორეელი ძიუდოისტები მოიაზრებიან. იაპონელებს ამ წონაში კენტა ნაგასავა გამოჰყავთ. იგი 24 წლისაა და მსოფლიო ჩემპიონატებზე პირველად დაიცავს იაპონიის ღირსებას. ნაგასავას კარიერიდან იმის გამორჩევა შეიძლება, რომ ორი გრანსლემის ოქრო აქვს მოპოვებული. კორეელი დონგან გვაკი კი უფრო გამოცდილი და ტიტულოვანი მოწინააღმდეგეა. გვაკი 2015 წელს მსოფლიო ჩემპიონი გახდა.  იგი ასევე ოლიმპიადის ბრინჯაოს პრიზიორია. სულ ახლახან, გვაკმა აზიური თამაშები მოიგო და ბაქოში გასამართი მსოფლიო ჩემპიონატისთვის იდეალურადაა მომზადებული.

ევროპელებიდან ერთ-ერთი მთავარი ფავორიტი რეიტინგის მოქმედი პირველი ნომერი, სერბი ალექსანდრ კუკოლია. კუკოლმა მიმდინარე სეზონში ეკატერინბურგის გრანსლემზე ოქრო, ხოლო ბუდაპეშტის გრან პრიზე ბრინჯაო მოიპოვა. სერბს ჯერ მსოფლიო ჩემპიონატების მედალი არ აქვს და ბაქოში დიდი მონდომებით იჭიდავებს.

ალექსანდრ კუკოლი, კრისტიან ტოთი, მიხაილ იგოლნიკოვი


აუცილებლად უნდა ვახსენოთ უნგრელი კრისტიან ტოთი, რომელიც სავარაუდოდ, მეოთხედფინალში ბექა ღვინიაშვილს შეხვდება. ტოთი 90 კგ წონით კატეგორიაში ერთ-ერთ სტაბილურ ძიუდოისტად ითვლება და მასთან ჭიდაობა ბაქოშიც ყველას გაუჭირდება. უნგრელს მსოფლიოსა და ევროპის ჩემპიონატებზე ვერცხლის მედლები აქვს მოპოვებული.

ბოლოს კი მოქმედი ევროპის ჩემპიონი,  რუსი მიხაილ იგოლნიკოვი ვახსენოთ. მიმდინარე სეზონში მან დიუსელდორფის გრანსლემიც მოიგო. თუ ყველაფერი ლოგიკის მიხედვით წავიდა, იგოლნიკოვი ნახევარფინალში სწორედ ღვინიაშვილს შეხვდება და ეს ერთ-ერთი მთავარი დაპირისპირებაა, რომელსაც ძიუდოს გულშემატკივრები ბაქოში გასამართი მსოფლიო ჩემპიონატისგან მოელიან.

GE EN RU