სვანეთინიუსი 17.09.2019

ფესტივალისთვის „სვანეთობა 2018“ მესტიის მერია 15 ათას ლარამდე დახარჯავს

26.07.2018 19:45
მესტიაში, სეტის მოედანზე ფესტივალი „სვანეთობა 2018“ 29 ივლისს გაიმართება.
ღონისძიების ფარგლებში წარმოდგენილი იქნება ადგილობრივი სამზარეულო - 17 ტერიტორიული ორგანოს მხრიდან ათამდე სახეობის ტრადიციული სვანური კერძი.
სტუმრებს ექნებათ საშუალება გაეცნონ ფესტივალზე წარმოდგენილ ხალხური რეწვის ოსტატების ნამუშევრებსა და ხელთნაკეთ ნივთებს.
შესყიდვის სავარაუდო ღირებულება 15 ათასი ლარია.
ამ თანხაში შედის მოწვეული 160 კაცის კვება და ორი ღამით განთავსება. ასევე სამი ფანდურის შეძენა, სიგელების დამზადება და სხვა.
ასევე ფესტივალზე გამოვლინდება სვანეთის საპატიო მოქალაქე.
წინადადებების მიღება 15 ივლისს დაიწყო და 17 ივლისს დასრულდა.

შეგახსენებთ სხვა დაგეგმილ ღონისძიებებსაც:

"სვანეთობა 2018-ში" მონაწილეობას მიიღებენ, როგორც ადგილობრივი ფოლკლორის წარმომადგენლები, ასევე პოპულარული ქართველი შემსრულებლები. პროექტი ფოლკლორის სფეროში მოღვაწე ადამიანებს მისცემს საშუალებას, წარმოაჩინონ საკუთარი შესაძლებლობები, წარადგინონ საკუთარი ნაშრომები.
ფესტივალის ფორმატიდან გამომდინარე პრიზებით დაჯილდოვდებიან ფოლკლორის სფეროში მოღვაწე ადამიანები
ფესტივალის ფარგლებში გაიხსნება სამეწარმეო მარკეტი „აწარმოე საქართველოში“ მხარდაჭერით, რომელშიც წარმოდგენილი იქნება 30 მეწარმე.
დაიდგმება სავაჭრო ფურა, სადაც გაიყიდება ჰოთ-დოგები და ლუდი, მოეწყობა შეჯიბრი ლუდის სმაში.
პროექტის ფარგლებში ასევე წარმოდგენილი იქნება საბავშვო კუთხე, სადაც გაიმართება სხვადასხვა გასართობი აქტივობები.
ფესტივალის ფარგლებში მოხდება ტრადიციული სვანური სამზარეულოსა და ხალხური რეწვის ნიმუშების გამოფენა. ადგილობრივ მოსახლეობას, ჩამოსულ ქართველ თუ უცხოელ სტუმრებს, შესაძლებლობა ექნებათ ფესტივალის მიმდინარეობის დროს მესტიის მუნიციპალიტეტის ტერიტორიული ერთეულების პავილიონებთან დააგემოვნონ სვანური ტრადიციული სამზარეულო, ასევე დაათვალიერონ პავილიონებში წარმოდგენილი ხალხური რეწვის ოსტატების ნამუშევრები.

და ბოლოს, ფესტივალის დასკვნით ეტაპზე, საღამოს 8 საათზე თქვენთვის ჯგუფები, "რეგიონი" და "ეგარი" იმღერებენ.

ფესტივალი მესტიის მუნიციპალიტეტის მერიისა და საქართველოს ტურიზმის ეროვნული ცენტრის, პროექტ CHECK IN GEORGIA-ს მხარდაჭერით ხორციელდება.

ფესტივალი "სვანეთობა" უკვე მეოთხე წელია ტარდება.
GE EN RU